Stríðsárin eru eitt litríkasta tímabilið í íslenskri menningarsögu á síðari öldum. Þau nutu lítillar virðingar lengst af en hafa loks fengið uppreisn æru. Íslenska stríðsárasafnið á Reyðarfirði var reist árið 1995 í þeim tilgangi að gera fólki kleift að ferðast aftur til daga hersetunnar og ýmist rifja upp gömul kynni eða stofna til nýrra.
Megináhersla er lögð á lífið á stríðsárunum og áhrif hersetunnar á íslensku þjóðina. Sýningar safnsins snúast um að koma þeim til skila á lifandi og skemmtilegan hátt. Á stríðsárunum voru á Reyðarfirði um 4000 hermenn, breskir, kanadískir, norskir og bandarískir. Enda þótt fjöldinn hafi verið enn meiri á öðrum stöðum hafa hlutföllin kannski hvergi verið jafn yfirþyrmandi enda Reyðfirðingar aðeins um 300 talsins. Þessi fjöldi hermanna gerði það að verkum að á svipstundu breyttist Reyðarfjörður úr viðburðarlausu smáþorpi með viðvarandi fátækt og atvinnuleysi í stað þar sem framboð var nóg á vinnu og menningarlíf reis í æðra veldi.
En styrjöldin varpaði líka skugga sínum yfir Reyðarfjörð því þýskar flugvélar lögðu oft leið sína þangað í njósnaferðir. Þá fóru loftvarnaflautur á stað og byssur setuliðsins geltu að óboðnum gestum. Þá þustu Reyðfirðingar í loftvarnarbyrgin sem voru víða í þorpinu.
Reyðfirðingar minnast hernámsins þann fyrsta júlí ár hvert en þann dag var Reyðarfjörður hernuminn árið 1940. á hernámsdaginn fara íbúar í föt sem minna á hernámsárin og ganga upp á stríðsárasafn, hertrukkar og hermenn eru á ferðinni og fólk fær sér Fish &Chips og stríðstertu á veitngahúsum bæjarins.
Íslenska stríðsárasafnið
Spítalakampi við Hæðargerði
730 Fjarðabyggð
Sími: 470 9063 og 860 4726. Netfang:
sofn@fjardabyggd.is
Opið daglega milli 13:00 - 17:00 frá 1. júní til 31.ágúst. Utan þess tíma, eftir samkomulagi.