Beint flug á milli Lundúna og Egilsstaða kynnt

Kynning var á þessari nýju og áhugaverðu flugleið í flugstöðinni á Egilsstaðarflugvelli í dag, en flogið verður tvisvar í viku til 24. september 2016, með möguleika á vetrarflugi ef vel tekst til. Einnig var fyrirhugað flug á milli Egilsstaða og Keflavíkur kynnt, sem nýtast mun farþegum á flugleiðinni.

Sala hefst á næstu vikum, en Discover the World er með stærstu alþjóðlegu ferðaskrifstofum sem sérhæfa sig í Íslandsferðum. Fulltrúar ferðaskrifstofunnar hafa á undanförnum mánuðum kynnt sér aðstæður á Austurlandi og rætt við aðila innan ferðaþjónustunnar.

Beint flug á milli Egilsstaða og London verður mikil lyftistöng fyrir ferðaþjónustu á svæðinu sem og fyrir landið allt. Efling alþjóðlegs flugs um Egilsstaðaflugvöll er eitt af sóknaráætlunarverkefnum landshlutans, slíkar fyrirætlanir eiga sér langa sögu á Austurlandi en aðstæður nú eru sérstaklega hagstæðar. Skiptir þar mestu sá mikli fjöldi ferðamanna sem kemur til Íslands, fyrirsjáanleg fjölgun þeirra á næstu árum og áherslur stjórnvalda á að dreifa þeim betur um landið.