Mikið var um að vera í leikskólum sveitarfélagsins á degi leikskólans sem haldinn var hátíðlegur á mánudag.
Nemendur í Kærabæ að læra stafina
Á Stöðvarfirði var opið hús fyrir hádegi. Þónokkuð af fólki kom við og kynnti sér starf leikskólans. Á opna húsinu var sýning á verkefnum nemenda og myndasýning úr leikskólanum í gegnum árin. Voru grunnskólanemendur sem litu við einstaklega áhugasamir um myndasýninguna þar sem þeir sáu sjálfa sig á leikskólaaldri.
Á Fáskrúðsfirði var einnig mikið um að vera. Nemendur höfðu farið með listaverk og hengt upp á vinnustöðum bæjarins, t.d. skrifstofum Loðnuvinnslunnar og í Kjörbúðinni. Eftir hádegi voru nemendur á fullu í störfum sínum, þeir yngri að fara út að leika og þeir eldri voru að læra stafina í gegnum leik.
Á Reyðarfirði var sólarpönnukökukaffi fyrir eldri borgara en auk þess höfðu nemendur hengt upp listaverk, t.d. í Molanum. Þar verður hægt að skoða þau næstu daga. Nemendur höfðu það notalegt og eftir sólarpönnukökurnar voru nemendur við fjölbreyttan leik á deildum sínum.
Á Eskifirði voru hengd upp listaverk eins og á öðrum stöðum. Farið var með listaverk á áberandi staði í bænum, m.a. á lögreglustöðina og í Hulduhlíð.
Í Neskaupstað voru líka hengd upp listaverk á fjölförnum stöðum, á pósthúsinu, sundlauginni, Nesbakka og kaffihúsinu.
Deginum var ætlað að vekja athygli á hinu góða starfi sem fer fram í leikskólanum sem hann gerði svo sannarlega. Allir eru hvattir til þess að skoða myndasýningarnar.
Fleiri myndir:Nemendur í Dalborg við myndir sínar í HulduhlíðNemendur á Eyrarvöllum hengdu upp myndir á ýmsa staði í bænumNemendur úr Lyngholti hengdu upp myndir af sólinni í MolanumÍ Lyngholti voru nemendur við leik eftir pönnukökukaffiðVel var mætt á opið hús í StöðvarfjarðarskólaGestir í Stöðvarfjarðarskóla voru á öllum aldriHús og fjölskyldur nemenda í Kærabæ
