Ólöf Nordal, innanríkisráðherra, hleypti formlega síðustu sprengingu Norðfjarðarganga af í dag. Stór dagur fyrir Austurland allt, að sögn Páls Björgvins Guðmundssonar, bæjarstjóra Fjarðabyggðar.
Ólöf Nordal, innanríkisráðherra, ýtir á hnappinn með Hrein Haraldsson, vegamálastjóra sér við hlið.
Með nýjum Norðfjarðargöngum hafa skapast, að sögn Páls Björgvins, aðstæður sem vinna í raun með vaxtarmöguleikum Austurlands í samfélagslegu og atvinnulegu tilliti. Á það ekki hvað síst við lykilstofanir á borð við Fjórðungssjúkrahúsið í Neskaupstað og Verkmenntaskóla Austurlands ásamt þeirri miklu verðmætasköpun sem á sér stað á svæðinu og stendur undir allt að 30% af vöruútflutningi landsmanna. Dagurinn hafi því verið stór fyrir ekki aðeins Fjarðabyggð heldur Austurland allt.
Gegnumslag í Norðfjarðargöngum náðist 17. september sl. Aðeins 7 metrar voru þá eftir ósprengdir, en hver sprengifæra er 5 metrar. Beðið var með þá tvo metra sem eftir stóðu þar til í dag fyrir ráðherrasprenginguna, sem markar jafnframt þau ánægjulegu tímamót að sjálf göngin eru orðin að veruleika. Löng hefð er fyrir því í gangagerð hér á landi, að það komi í hlut ráðherra að sprengja síðasta haftið.
Í tilefni dagsins bauð verktakinn Suðurverk - Metrostav til móttöku í göngunum miðjunum, þar á meðal starfsmönnum gangagerðarinnar og fulltrúum sveitarfélagsins.
Fleiri myndir:Suðurvek-Metrostav bauð starfsfólki og samstarfsaðilum í móttöku í tilefni dagsins.Ný Norðfjarðargöng eru orðin að veruleika.
