Í upphafi dagskrár ræsti Björt Ólafsdóttir umhverfis- og auðlindaráðherra hlaupara sem tóku þátt í Hágarðahlaupi knattspyrnudeildar Þróttar Neskaupstað. Góð þátttaka var í hlaupinu en hægt var að velja um 3 hlaupaleiðir auk þess sem boðið var uppá sérstakt krakkahlaup. Allar hlaupaleiðirnar fóru eftir stígum og götum sem orðið hafa til við framkvæmdir við snjóflóðavarnarmannvirkin.

Að ræsingu lokini flutti Jón Björn Hákonarsson stutt ávarp fyrir hönd Fjarðabyggðar og Irena Fönn Clemmensen flutti tvö ljóð. Björt Ólafsdóttir flutti svo ávarp áður en gengið var upp fyrir minningarreitin þar sem Sigurður Rúnar Ragnarsson, sóknarprestur í Neskaupstað, blessaði mannvirkin.

Það voru svo þau Björt Ólafsdóttir, Páll Björgvin Guðmundsson, Eydís Ásbjörnsdóttir, Jón Björn Hákonarson og Jens Garðar Helgason sem klipptu á borða og vígðu þar með snjóflóðavarnarmannvirkin formlega. Að athöfn lokini var fólki boðið til móttöku í Safnahúsinu í Neskaupstað.