Hertar sóttvarnarráðstafanir - breytingar á þjónustu Fjarðabyggðar

Tillögurnar voru kynntar á blaðamannafundi í Hörpu í dag kl. 13:00 og helstu breytingar eru þessar:

• 10 manna fjöldatakmörk - meginregla.
  • 50 manna hámarksfjöldi í lyfja- og matvöruverslunum, en reglur um aukinn fjölda með hliðsjón af stærð húsnæðis.
  • Fjöldatakmarkanir gilda ekki um almenningssamgöngur, hópbifreiðar, innanlandsflug eða störf viðbragðsaðila.
• Krám og skemmtistöðum verður lokað.
• Sundlaugum verður lokað.
• Veitingastaðir með vínveitingaleyfi mega ekki hafa opið lengur en til kl. 21.00.
• Grímuskylda þar sem ekki er unnt að tryggja 2 metra nálægðarmörk, milli einstaklinga sem ekki eru í nánum tengslum.

Nánari upplýsingar má nálgast á vef Heilbrigðisráðuneytisins með því að smella hér.

Þessar ráðstafanir munu óhjákvæmilega hafa áhrif á þjónustu Fjarðabyggðar.

• Sundlaugar og íþróttamannvirki Fjarðabyggðar munu loka frá með laugardeginum 31.10.2020.
• Allt íþrótta – og æskulýðsstarf í Fjarðabyggð leggst niður frá og með laugardeginum 31.10.2020.
• Ljóst er að takmarkanir munu hafa áhrif á skólastarf, sérstaklega í grunnskólum. Unnið er að útgáfu reglugerðar varðandi skólastarf og munu tilkynningar varðandi breytingar á því verða gefnar út um leið og reglugerðin liggur fyrir.
• Ákveðið hefur verið að starfsdagur verði í öllum grunnskólum Fjarðabyggðar mánudaginn 2. nóvember, til að gefa skólunum tækifæri til að skipuleggja starfsemi sína. 
• Foreldrar eru beðnir um að fylgjast með tilkynningum á heimasíðu Fjarðabyggðar og í tölvupósti um helgina varðandi aðra tilhögun skólastarfs.
• Mánudaginn 2. nóvember mun þjónusta leikskóla og tónlistarskóla verða óbreytt.
• Fólk er beðið um að nýta sér rafræna möguleika til að hafa samskipti við sveitarfélagið og starfsmenn sé þess nokkur kostur. Er þar sérstaklega bent á íbúagátt Fjarðabyggðar.
• Á hjúkrunarheimilum Fjarðabyggðar er unnið eftir ströngum sóttvarnarreglum og í gildi eru sérstakar reglur um heimsóknir aðstandenda. Aðeins einn aðila má heimsækja íbúa, alltaf sá sami, einu sinni á dag milli kl. 15:00 og 17:00.

Allar upplýsingar og tilkynningar verða settar inn á www.fjardabyggd.is og fésbókarsíðu sveitarfélagsins, um leið og þær liggja fyrir. Á heimasíðu Fjarðabyggðar hefur verið sett upp sérstök upplýsingasíða þar sem hægt verður að fylgjast með öllum tilkynningum sem Fjarðabyggð sendir frá sér á meðan þetta ástand varir. Einnig er bent á heimasíðu Landlæknisembættisins og www.covid.is þar sem allar upplýsingar er að finna.

Gott hefur verið að finna þá miklu samstöðu sem einkennt hefur viðbrögð okkar allra í þessum faraldri. Framundan eru eflaust fleiri áskoranir sem koma til með að reyna á allt samfélagið. Þá er gott til þess að vita að Fjarðabyggð hefur á að skipa úrvalsfólki í öllum stofnunum. Við munum öll leggja okkar af mörkum til að þessar breytingar gangi eins vel og mögulegt er í okkar góða samfélagi.

Þetta er verkefni sem við tökumst á við saman og munum að það vorar að nýju og þetta ástand gengur yfir!