mobile navigation trigger mobile search trigger
25.07.2019

Skapandi sumarsmiðjur

Þann 13. júlí var haldið lokahóf skapandi sumarsmiðja, fyrir börn á aldrinum 8-12 ára í Fjarðabyggð. Í ár bauð Menningarstofa upp á sex mismunandi smiðjur fyrir börnin og var mætingin prýðileg. Tæplega 70 börn voru skráð í heild, enda fjölbreyttar og skemmtilegar smiðjur í boði.

Skapandi sumarsmiðjur

Börnin gátu valið um leiklistarsmiðju, leik- og dansnámskeið, skapandi smiðju sem fjallaði um töfra silfurbergs, listasmiðju, hugmyndasmiðju eða ritlistarnámskeið. Frábærir leiðbeinendur komu að smiðjunum ár en í þeim hópi voru Benedikt Gröndal, Emelía Antonsdóttir Crivello, Íris Indriðadóttir, Nína Kristín Guðmundsdóttir, Selma Hreggviðsdóttir, Sirra Sigrún Sigurðardóttir, Unnur Sveinsdóttir og Viktoría Blöndal.

Markmið skapandi sumarsmiðja í ár var að hvetja börn til þess að sýna hugrekki í sköpun og tjáningu. Börnin fengu að kynnast því fjölbreytta fagi sem skapandi greinar bjóða upp á og var áherslan lögð á að nota ímyndunarafl og skynfærin til að upplifa nærumhverfið.
Menningarstofa þakkar öllum þeim sem komu að skapandi sumarsmiðjum og við hlökkum til að sjá sem flesta aftur næsta sumar.