Atvinna og þjónusta

Menntun og frístundir

Í Fjarðabyggð er sterkt skóla- og frístundastarf. Í öllum byggðarkjörnum starfa öflugir leik- og grunnskólar, tónlistarskóli og félagsmiðstöðvar þar sem unnið er faglegt starf í nánu samstarfi við fjölskyldur og nærsamfélag.

Atvinnulíf og innviðir

Sjávarútvegur, fiskvinnsla, fiskeldi og stóriðja eru helstu atvinnugreinar í Fjarðabyggð. Einnig er nokkur landbúnaður stundaður, einkum í Breiðdal, Norðfjarðarsveit og Fáskrúðsfirði. Ýmsum greinum tengdum þjónustu, iðnaði og nýsköpun hefur vaxið fiskur um hrygg á undanförnum árum og fjölmörg störf skapast í kjölfarið.
Í Neskaupstað var Samvinnuhúsið Múlinn opnað í lok árs 2020 – skrifstofu- og nýsköpunarklasi þar sem fyrirtæki og einstaklingar geta leigt vinnuaðstöðu og þróað hugmyndir sínar áfram.

Íþróttir, félagslíf og menning

Menningar- og félagslíf í Fjarðabyggð er í miklum blóma og íþrótta- og æskulýðsstarf kraftmikið. Ungmennafélög í hverjum byggðarkjarna sjá um metnaðarfullt starf allt árið.
Sveitarfélagið býr vel að íþróttamannvirkjum: fimm íþróttahús eru í Fjarðabyggð ásamt fimm sundlaugum. Á Reyðarfirði er fjölnota íþróttahúsið Fjarðabyggðarhöllin, sem nýtist m.a. vel til knattspyrnuiðkunar, ásamt gervigrasvelli utanhúss í Neskaupstað.

Þjónusta og verslun

Í Fjarðabyggð er góð aðstaða til búsetu og rekstrar. Meðal þjónustustofnana má nefna Fjórðungssjúkrahús Austurlands, Verkmenntaskóla Austurlands, útibú Vegagerðar ríkisins, Lögreglustjórann á Austurlandi, Náttúrustofu Austurlands, Heilbrigðiseftirlit Austurlands, útibú Matís á Norðfirði og rannsóknarsetur Háskóla Íslands í Breiðdal sem sinnir einkum rannsóknum á sviði jarðfræði og málvísinda.

Verslun og þjónusta dafnar vel; í Fjarðabyggð er að finna dagvöru- og lágverðsverslanir, handverksbakarí, banka, lyfjaverslanir og fjölbreyttar sérverslanir ásamt öflugum aðilum í iðntengdum þjónustugreinum. Rekstur hótela, gistihúsa og veitingastaða er einnig vaxandi.

Hafnir og útflutningur

Fjarðabyggðarhafnir eru meðal öflugustu hafna landsins og fáar hafnir sjá meiri fiskafla koma á land. Hafnirnar eru næststærsta höfn landsins mælt í vöruútflutningi, með um þriðjung alls vöruútflutnings landsmanna, og sú stærsta þegar horft er sérstaklega til útflutnings ál- og fiskafurða.

Laus störf

Laus störf hjá Fjarðabyggð má sjá á ráðningarvef sveitarfélagsins. Á vefnum austurland.is og á alfred.is má einnig finna auglýst störf á Austurlandi.