Fara í efni

Dýrahald

Gæludýrahald innan þéttbýlismarka í Fjarðabyggð er háð ákveðnum reglum sem ætlað er að tryggja öryggi, heilbrigði og velferð bæði dýra og íbúa. Hér má finna upplýsingar um skráningarskyldu dýra, leyfisgjöld, ormahreinsun og hvernig á að koma ábendingum og kvörtunum á framfæri. Markmiðið er að gera kröfur og verklög skýr fyrir alla sem halda gæludýr og stuðla að góðri umgengni í samfélaginu.

Hundar, kettir og fiðurfénaður eru skráningarskyld innan þéttbýlismarka í Fjarðabyggð.

  • Dýrið skal skráð innan mánaðar frá komu á heimilið.
  • Ungviði skal skrá frá þriggja mánaða aldri.
  • Tilkynna skal um afskráningu innan mánaðar frá því að dýrið flytur eða deyr.

Hægt er að kynna sér reglur um dýrahald hér og samþykki íbúa má finna hér

  • Umsóknareyðublöð fást á Íbúagátt Fjarðabyggðar
  • Þegar umsókn hefur verið samþykkt:
  • Eigandi fær umsóknarnúmer og samþykktir sveitarfélagsins
  • Greitt er leyfisgjald afturvirkt, miðað við ormahreinsunartímabilið (sept./okt.)
  • Örmerking er lögbundin skylda fyrir hunda, ketti og kanínur
  • Ómerkt dýr telst hálfvillt
  • Upplýsingar eru skráðar í gagnagrunninn Dýraauðkenni
  • Athugið: Þessi grunnur tengist ekki skráningarkerfi sveitarfélagsins.

Fyrir hunda og ketti skal greiða leyfisgjald samkvæmt gjaldskrá.

  • Árlegt leyfisgjald er sent með greiðsluseðli undir lok hvers árs.
  • Innifalið í leyfisgjaldi er:
    • Ormahreinsun
    • Almenn umsýsla (t.d. þjónusta og samskipti við gæludýraeigendur)
    • Aðstoð við leit að týndum dýrum
    • Viðhald hundasvæða

Ormahreinsun er hluti af árlegri þjónustu.

  • Boðun í ormahreinsun er send út á haustin á heimasíðu Fjarðabyggðar.
  • Skylt er að mæta með hunda og ketti í hreinsunina og/eða framvísa vottorði um hreinsun.
  • Árleg hreinsun fer fram á tímabilinu október-nóvember.

Ábendingar eða kvartanir vegna gæludýrahalds, t.d. vegna ónæðis, skal senda til dýraeftirlits Fjarðabyggðar:

Gjaldskrá fyrir hunda- og kattahald

Gjaldskrá fyrir hunda- og kattahald í Fjarðabyggð

1. gr. Hundahald

Árlegt leyfisgjald fyrir að halda hund í Fjarðabyggð, sbr. 18. gr. samþykktar nr. 990/2022, er 19.066 kr.

Gjalddagi er 1. október ár hvert og eindagi 30. október. Innifalið í gjaldinu er ormahreinsun auk umsýslugjalda sveitarfélagsins.

Eigandi eða umsjónarmaður hunds sem lokið hefur hlýðninámskeiði hjá viðurkenndum hundaþjálfara getur sótt um 50% afslátt. Afslátturinn gildir út skráningartíma hunds í sveitarfélaginu.

Undanskildir gjaldi eru leitarhundar, björgunarsveitarhundar, lögregluhundar, aðstoðar- og þjónustuhundar sem hlotið hafa viðurkennda þjálfun, svo sem leiðsöguhundar.

2. gr. Kattahald

Árlegt leyfisgjald fyrir að halda kött í Fjarðabyggð, sbr. 18. gr. samþykktar nr. 990/2022, er 11.611 kr.

Gjalddagi er 1. október og eindagi 30. október ár hvert. Innifalið í gjaldinu er ormahreinsun og umsýslugjöld.

Hægt er að sækja um 50% afslátt ef köttur hefur farið í ófrjósemisaðgerð. Afslátturinn gildir út skráningartíma kattar í sveitarfélaginu.

3. gr. Handsömun og vörslugjöld

  • Handsömunargjald: 20.943 kr.
  • Vörslugjald eftir fyrsta sólarhring: 10.484 kr. á dag

Að auki skal greiða allan útlagðan kostnað sveitarfélagsins vegna hundsins.

Eigandi getur fengið hund afhentan að lokinni skráningu og gegn framvísun greiðslustaðfestinga fyrir skráningu, handsömun og öðrum kostnaði.

4. gr. Vextir og innheimta

Um vexti af vangreiddum gjöldum gilda almennar reglur. Innheimta fer samkvæmt lögum nr. 7/1998 um hollustuhætti og mengunarvarnir.

Heimilt er að innheimta gjöld með fjárnámi.

5. gr. Lagagrundvöllur og gildistaka

Gjaldskrá þessi er sett með vísan til samþykktar um hunda- og kattahald og 59. gr. laga nr. 7/1998 um hollustuhætti og mengunarvarnir, ásamt reglugerð nr. 941/2002.

Gjaldskráin tekur gildi 1. maí 2026 og fellur þá úr gildi eldri gjaldskrá nr. 1353/2025.