Fatlað fólk

Fatlað fólk getur mætt áskorunum í daglegu lífi. Ráðgjöf fyrir fatlað fólk felur í sér persónulegan stuðning og leiðsögn fyrir einstaklinga. Markmið ráðgjafar er að aðstoða fólk við að þekkja þjónustuna sem er í boði og aðstoða við að lifa sjálfstæðu og virku lífi. Hægt  er að óska eftir viðtali við ráðgjafa í síma 470 9000 eða í gegnum netfangið felagsthjonusta@fjardabyggd.is.

Fatlað fólk sem fellur undir reglur Fjarðabyggðar um félagslegt leiguhúsnæði getur sótt um félagslega leiguíbúð í Fjarðabyggð. Á eyðublaðinu skal merkja við ef þörf er á sérstöku húsnæði vegna fötlunar og skal þá gera mat á þeirri þörf áður en íbúð er úthlutað.  

Í Fjarðabyggð er einn búsetukjarni með sólarhringsþjónustu, staðsettur við Búðareyri 10, Reyðarfirði. Þar eru sex íbúða búsetukjarni ásamt skammtímadvöl fyrir fötluð börn.

Stuðningsþjónusta fyrir fullorðið fatlað fólk mætir því á þeim stað sem það er á í lífinu og fer fram þar sem best hentar, hvort sem það er á heimili þess, utan heimilis eða í gegnum rafrænar lausnir. Fólk fær stuðning við að útfæra þjónustuna þannig að hún styðji það við að lifa sjálfstæðu lífi, fást við dagleg verkefni og efla þátttöku sína í samfélaginu. 

Notendastýrð persónuleg aðstoð byggir á hugmyndafræðinni um sjálfstætt líf. Fatlað fólk með NPA stýrir sjálft fyrirkomulagi þjónustunnar, ákveður hvaða aðstoð er veitt, hvernig hún er skipulögð og hver veitir hana. 
Einnig geta notendasamningar m.a. verið beingreiðslusamningar þar sem fatlað fólk stýrir sjálft fyrirkomulagi þjónustunnar.
Fyrsta skrefið í að sækja um notendasamninga er að bóka samtal hjá ráðgjafa.

Stuðningsfjölskyldur veita foreldrum stuðning við foreldrahlutverkið. Hlutverk þeirra er m.a. að veita foreldrum tækifæri til hvíldar, styrkja stuðningsnet barnanna og auka möguleika þeirra á félagslegri þátttöku. Sótt er um rekstrarleyfi sem stuðningsfjölskylda hjá Gæða- og eftirlitsstofnun velferðarmála.  

Sjá nánar hér: Rekstrarleyfi sem stuðningsfjölskylda

Stuðningsþjónusta fyrir börn og fjölskyldur þeirra felur í sér fjölbreyttar lausnir sem eru útfærðar eftir þörfum hvers og eins. Foreldrar geta fengið stuðning við uppeldishlutverk sitt og börn fá stuðning til að auka virkni, bæta samskipti og efla sjálfstraust sitt.  

Fatlað fólk er hvatt til að sækja um auglýst störf hjá Fjarðabyggð. Ef af ráðningu verður er reynt að mæta sérhæfðum þörfum starfsfólks eftir bestu getu. Þegar þörf er á aðstoð við atvinnuleit, þjálfun eða stuðning við vinnu á almennum markaði getur atvinna með stuðningi (AMS) hentað, en sú þjónusta er á vegum Vinnumálastofnunar.

Sjá nánar hér: Vinnumálastofnun

Fatlað fólk sem ekki er fært um að sinna almennum störfum og þarf umfangsmeiri aðstoð getur sótt um verndaða vinnu, hæfingu og virkniþjálfun sem sniðin er að þörfum hvers og eins hvað varðar stuðning, tímalengd og verkefni.

Sjá nánar hér: Virkniþjálfun

Vinnumálastofnun tekur við umsóknum og boðar þig í kjölfarið í viðtal þar sem næstu skref eru ákveðin.

Sjá nánar hér: Vinnumálastofnun

Ef að niðurstaðan er sú að vernduð vinna, hæfing eða virkniþjónusta henti þér sendir Vinnumálastofnun málið áfram til viðeigandi sveitarfélags.  

Á Austurlandi er Hæfing/Iðja staðsett í Stólpa, Lyngási 2, 700 Egilsstöðum. 

Fatlað fólk sem getur ekki nýtt sér almenningssamgöngur eða eigið farartæki getur átt rétt á akstursþjónustu. Aksturþjónustan er ætluð einstaklingum sem eiga lögheimili í Fjarðabyggð sem vegna skertrar líkamlegrar og andlegrar færni sem rekja má til fötlunar þurfa stuðning við að sækja atvinnu, nám og/eða notið tómstunda og afþreyingar.  

Megintilgangur er að fólk geti stundað vinnu, nám, notið heilbrigðisþjónustu, hæfingar og þjálfunar hvers konar og tómstunda. Þjónustusvæði akstursþjónustu er Fjarðabyggð. 

Fatlað fólk getur átt rétt á styrk, annars vegar til að greiða námskostnað og hins vegar til að kaupa verkfæri eða tæki. Markmið styrkjanna er að auka þátttöku fatlaðs fólks í félagslífi og atvinnu með því að auðvelda því að afla sér menntunar, færni og reynslu. 
Umsóknir eru afgreiddar einu sinni á ári í mars.  

Aðstoðarmannakort er ætlað þeim einstaklingum sem þurfa aðstoð aðstoðarmanns til þess að geta farið í sund í sveitarfélaginu Fjarðabyggð. Með aðstoðarmannakorti fær aðstoðarmaður umsækjanda frítt í sund þegar hann fylgir þeim einstaklingi sem kortið er skráð á.  

Mat ráðgjafa fjölskyldusviðs liggur til grundvallar samkvæmt viðmiðum s.s. SIS mati og mati á stuðningsþörf.

Skammtímadvöl er fyrir fötluð börn og ungmenni. Hlutverk skammtímadvalar er að veita börnum kost á að dvelja tímabundið utan heimilis síns og veita fjölskyldum þeirra stuðning.