Bæjarráð

Framlagt að nýju minnisblað varðandi sjálfvirknivæðingu í móttöku og símsvörun. Upplýsingafulltrúi kom á fundinn og fór yfir minnisblaðið. Bæjarráð samþykkir fyrirliggjandi tillögur sviðsstjóra varðandi sjálvirknivæðingu móttöku og símsvörunar, en um verði að ræða tilraunaverkefni til eins árs. Upplýsingafulltrúa falið að vinna málið áfram.

Framlögð til kynning Vegagerðinnar á drögum að nýju leiðakerfi landsbyggðarvagna Strætó, ásamt fundargerð kynningarfundar sem fram fór 30. september sl og minnisblaði sviðsstjóra mannauðs- og umbótasviðs.

Bæjarráð þakkar fyrir kynninguna og felur bæjarstjóra að óska eftir því að fulltrúar Vegagerðinnar komi á fund bæjarráðs til að fara yfir málið.

Framlagt minnisblað upplýsingafulltrúa vegna stöðu mála í ábendingakerfi Fjarðabyggða, og virkni kerfisins. Bæjarráð felur upplýsingafulltrúa að skerpa á verklagsreglum sem snúa að vinnslu ábendinga. Málið tekið fyrir að nýju á næsta bæjarráðsfundi, ásamt kynningu á nýju ábendingakerfi.

Dómsmálaráðherra hefur kynnt fyrirhugaðar breytingar á skipulagi lögreglu. Með breytingunum stendur til að lögregluembættum verði fækkað úr níu í þrjú auk þess sem skerpt verður á hlutverki ríkislögreglustjóra.

Bókun bæjarráðs:
"Bæjarráð Fjarðabyggðar mótmælir harðlega fyrirhuguðum breytingum á skipulagi lögreglu sem fela í sér sameiningu lögregluembættanna á Austurlandi, Suðurlandi og í Vestmannaeyjum. Bæjarráð hafnar því að sjálfstætt lögregluembætti á Austurlandi verði lagt niður og stjórnun löggæslu í landshlutanum verði færð í margra klukkustunda fjarlægð og út fyrir Norðausturkjördæmi.

Á Austurlandi er umfangsmikil atvinnustarfsemi, mikill innflutningur og útflutningur um hafnir og mikilvæg verkefni á sviði landamæraeftirlits. Þá hefur reynsla undanfarinna ára af náttúrvá sýnt með ótvíræðum hætti mikilvægi staðbundinnar þekkingar, skýrrar ábyrgðar og öflugrar stjórnunar almannavarna í heimabyggð.

Sveitarfélög á Austurlandi hafa lengi kallað eftir fjölgun lögreglumanna, bættum tækjabúnaði og auknu landamæraeftirliti. Bæjarráð telur ljóst að svar við þeim þörfum felist ekki í að færa yfirstjórn embættisins frá landshlutanum. Fækkun embætta og breyting á skipuriti jafngilda ekki eflingu löggæslu. Landfræðilegar fjarlægðir og verkefni lögreglunnar hverfa ekki við sameiningu.

Yfirlýsingar um óbreyttan fjölda starfsstöðva og aðstoðarlögreglustjóra í hverju umdæmi nægja ekki til að tryggja staðbundið ákvörðunarvald. Leggja þarf fram skýrar upplýsingar um valdheimildir, ráðstöfun mannafla, fjármögnun og stjórnun almannavarna. Án þeirra er enginn grundvöllur fyrir fullyrðingum um að breytingarnar styrki þjónustu og viðbragðsgetu á Austurlandi.

Bæjarráð telur fyrirhugaða tengingu Austurlands við Suðurland og Vestmannaeyjar illa samræmast landfræðilegum aðstæðum og þjónustutengslum. Komi til skoðunar breytingar á umdæmaskiptingu er mun eðlilegra að horfa til samstarfs við Norðurland. Slík skoðun verður þó að byggjast á raunverulegu samráði við sveitarfélög og viðbragðsaðila og mati á áhrifum á öryggi íbúa.

Bæjarráð gerir kröfu um að fallið verði frá þessum áformum og þess í stað ráðist í raunverulega eflingu lögreglunnar á Austurlandi með auknum mannafla, bættum búnaði og fjárveitingum sem endurspegla umfang verkefnanna. Austurland þarf öflugt lögregluembætti með stjórnun og ákvörðunarvald í landshlutanum."

Framlagt erindi Sigga Jensonar varðandi framkvæmdir við vegg sem reistur var við Kvíabólsstíg 4 í Neskaupstað. Sviðsstjóra skipulags- og framkvæmdasviðs falið vinna málið og svara erindinu í kjölfarið.

Framlagt erindi Sigga Jenssonar sem varðar varnir við Kvíabóls- og Þiljuvallalækjar. Bæjarráð felur sviðsstjóra skipulags- og framkvæmdasviðs að kalla eftir formlegu svari Ofanflóðasjóðs og svara erindinu í kjölfarið.

Fundargerð fundar stjórnar Sambands íslenskra Sveitarfélaga nr. 1002 frá 11. september lögð fram til kynningar.

Fundargerð 92. fundar stjórnar Samtaka sveitarfélaga á köldum svæðum frá 16. september 2026 lögð fram til kynningar.

Fundargerð fjölskyldunefndar nr. 67 tekin til umfjöllunar og afgreiðslu.

Fundur í stjórnkerfisnefnd.