Bæjarráð

Lögð fram tillaga að starfs- og fjárhagsáætlun Fjarðabyggðar og stofnana fyrir árið 2027 auk 3ja ára áætlunar fyrir árin 2028-2030.
Bæjarráð samþykkir tillögu að fjárhagsáætlun ársins 2027 auk þriggja ára áætlunar og vísar henni til fyrri umræðu bæjarstjórnar.

Fjallað um álagningarstofna fasteignagjalda árið 2027 og reglur.
Bæjarráð samþykkir að álagningarhlutfall fasteignagjalda á íbúðarhúsnæði fari úr 0,4 í 0,39 og vísar gjaldskrá fasteignagjalda 2027 og reglum þeim tengdum til staðfestingar bæjarstjórnar.

Framlögð fundargerð kynningarfundar um útboð almenningssamgangna á Austurlandi að hálfu Vegagerðarinnar en útboð hefur verið birt.

Fjallað um áform um orkuöflun úr Njörvadalsá og Geithúsaá. Framlagt sem trúnaðarmál minnisblað Jóns Jónssonar lögmanns vegna samninga um afnot af vatnsréttindum.
Bæjarráð felur bæjarstjóra að vinna áfram að málinu.

Framlögð beiðni frá Verkmenntaskóla Austurlands fyrir styrk til afnota af Egilsbúð þann 13. nóvember vegna dansleiks nema frá skólanum og Menntaskólanum á Egilsstöðum og Framhaldsskóla Austur Skaftafellssýslu.
Bæjarráð samþykkir að styrkja afnot nemanna af Egilsbúð fyrir dansleik. Tekið af liðnum óráðstafað 21690.

Framlögð tillaga frá Hrafni Bjarnasyni um nýtingu húsnæðisins að Bakkabakka 15 í Neskaupstað.
Bæjarráð hefur unnið að því að tryggja nýtingu Egilsbúðar og efla miðbæ Neskaupstaðar. Ekki eru mörg ár síðan ráðist var í endurbætur á húsinu, meðal annars til að koma þar fyrir félagsaðstöðu eldri borgara. Bæjarráð er meðvitað um að núverandi aðstaða rúmar ekki starfsemi Félags eldri borgara í Neskaupstað þegar þátttaka er sem mest. Mikilvægt er að félagið hafi góða aðstöðu sem mætir þörfum þess og styður við öflugt félagsstarf.
Bæjarráð leggur því til að stofnaður verði spretthópur í samráði við félagið til að skoða húsnæðismál þess. Hópurinn meti meðal annars möguleika á að koma félagsaðstöðu eldri borgara innan Egilsbúðar betur fyrir og leggi tillögur að úrbótum fyrir bæjarráð.

Bæjarráð samþykkir jafnframt að fulltrúar bæjarráðs skipi spretthópinn af hálfu sveitarfélagins.
Félag eldri borgara Norðfirði leggur til að stjórn félagsins ásamt Jóni Gunnari Sigurjónssyni verði fulltrúar félagsins.

Vísað frá hafnarstjórn til bæjarráðs tillögu að gjaldskrá Fjarðabyggðahafna fyrir árið 2027 ásamt minnisblaði.
Bæjarráð samþykkir framlögð drög að gjaldskrá og mun hún taka gildi 1. janúar 2027.

Lögð fram sem trúnaðarmál drög að yfirlýsingu vegna atvinnumála.
Bæjarráð samþykkir yfirlýsingu fyrir sitt leyti og felur bæjarstjóra undirritun hennar.

Umfjöllun um stjórnkerfi sveitarfélagsins.

Fram lögð tillaga um skipan fulltrúa Fjarðabyggðar í öldungaráð.
Bæjarráð tilnefnir:
Árni Helgason. Til vara: Albert Kemp
Elís Ármannsson, Til vara: Alma Sigurbjörnsdóttir
Benedikt Sigurjónsson. Til vara: Arndís Bára Pétursdóttir
Ólafur Helgi Gunnarsson. Til vara: Hákon Hansson

Skipun fulltrúanna vísað til bæjarstjórnar.

Jafnframt vísar bæjarráð erindisbréfi nefndarinnar til endurskoðunar bæjarstjórnar þannig að fulltrúum félaga eldri borgara verði fjölgað í fimm þannig að öll félögin eigi fulltrúa í ráðinu.

Farið yfir stöðu viðræðna Sambands íslenskra sveitarfélaga fyrir hönd sveitarfélaga við Kennarasamband Íslands um virðismatsvegferð samningsaðila.

Framlagðar til kynningar fundargerðir 99. 100. og 101. fundar stjórnar Samtaka sjávarútvegssveitarfélaga.

Framlagðar til kynningar fundargerð 93. fundar stjórnar Samtaka sveitarfélaga á köldum svæðum.

Framlögð til afgreiðslu fundargerð ungmennaráðs 28. september 2026.