Menningarstofa Fjarðabyggðar var sett á laggirnar árið 2017 og hlutverk hennar er að styðja við og efla menningarstarf í Fjarðabyggð á breiðum grundvelli. Menningarstofa starfar með aðilum í menningarlífinu og styður þá og eflir til góðra starfa. Öflugt menningarlíf er grundvallaratriði til að gera Fjarðabyggð að góðum stað til að búa á, og þar leikur Menningarstofa lykilhlutverk.

Menningarstofa er vöktunaraðili menningarumhverfis í Fjarðabyggð, sem felst í að greina þarfir ólíkra hópa og koma til móts við þarfir og langanir sem flestra. Menningarstofa leggur áherslu á að tryggja aðgengi allra íbúa svæðisins að menningu og listum, óháð búsetu, uppruna og  þjóðfélagsstöðu. Menningarstofa Fjarðabyggðar er tengiliður við grasrótarsamtök á sviði menningar, svo sem áhugaleikfélög og kóra, og stuðlar að góðu aðgengi til viðburðarhalds í húsnæði á vegum sveitarfélagsins. Menningarstofa leggur til sérverkefni í tengslum við gerð fjárhagsáætlunar sveitarfélagsins ár hvert.

Menningarstofa er tengiliður leik-, grunn- og tónlistarskóla, safna og annarra stofnana sveitarfélagsins við fagaðila úr skapandi greinum. Menningarstofa vinnur markvisst að auknu aðgengi að skapandi námi og starfi í samstarfi við fræðslustjóra, íþrótta- og tómstundafulltrúa og Safnastofnun Fjarðabyggðar. Enn fremur hvetur Menningarstofa til innleiðingar skapandi ferla í skólum, menningar- og frístundastarfi í Fjarðabyggð

Menningarstofa kynnir menningarstefnu og starfsemi Menningarstofu fyrir sviðum, stofnunum og fastanefndum Fjarðabyggðar. Menningarstofa er vakandi fyrir því að draga svið og stofnanir að borðinu, leiða samstarf og leggja til samstarfsverkefni þar sem við á.

Nánari upplýsingar um starfsemi Menningarstofu Fjarðabyggðar má finna á Facebook síðu Menningarstofunar sem finna má hér.