Hin hæfilega hallærislega, eins og þau lýsa sér sjálf, og ástæla hljómsveit Dægurlagadraumar mætir aftur til leiks og heldur tónlistarskemmtanir á Austurlandi í lok ágúst. Hljómsveitin, sem er mörgum Austfirðingum góðu kunn, býður upp á söng- og dansgleði í huggulegri kaffihúsastemningu þar sem flutt verður úrval dægurlaga frá miðri síðustu öld ,,lög sem virka eins og malt og hangikjöt á sálina!”
Tónlistarskemmtanirnar verða haldnar:
- Fimmtudaginn 29. ágúst kl. 20:00 – Tónspil, Neskaupstað
- Föstudaginn 30. ágúst kl. 16:00 – Valhöll, Eskifirði
Aðgangseyrir er 3.500 kr. og fer miðasala fram við innganginn. Gestum gefst færi á að kaupa sér veitingar meðan á flutningi stendur ásamt því að hlusta og dilla sér við okkar yndislegu íslensku (og íslenskuðu) dægurlög. Hinir sívinsælu smellir Hauks Morthens, Villa Vill, Erlu Þorsteins og fleiri lifna við á ný.
Blásið í gömlu glæðurnar
Hljómsveitin Dægurlagadraumar varð til árið 2011 á Egilsstöðum þegar haldnir voru þeirra fyrstu kaffihúsatónleikar með áherslu á klæðnað, stemningu og perlur dægurlagasögunnar. Hópurinn sló í gegn og lék víða um Austurland allt til ársins 2017, en þá fóru meðlimir í ólíkar áttir.
Nú, níu árum síðar, hefur hópurinn tekið aftur upp þráðinn. Stór hluti upprunalega hópsins hefur nú náð saman á ný til að glæða gömlu dægurlagin lífi á nýjan leik.
Hljómsveitina skipa að þessu sinni:
- Erla Dóra Vogler – Söngur
- Jón Hilmar Kárason – Gítar
- Garðar Eðvaldsson – Saxófónn
- Þórður Sigurðarson – Hljómborð/Píanó
- Haukur Ingólfsson – Trommur
Tónlistarskemmtanirnar eru styrktar af Fjarðabyggð (Menningarstofu Fjarðabyggðar), SVN, SÚN, Alcoa Fjarðaáli og Sesam Brauðhúsi.
Menningarstofa og Dægurlagadraumar hvetja alla Austfirðinga og gesti til að mæta, klæða sig í sitt besta púss og njóta dásamlegrar stundar!