Fara í efni
16.11.2026 Fréttir, Menning og mannlíf, Skólar og fræðsla

Hvað ef jólakötturinn færi út í geim?

Deildu

Eða jólasveinarnir týndu öllum gjöfunum? Kannski leynist saga um álf, furðudýr eða óvæntan gest við jólaborðið í huganum á þér?

Nú er tækifærið til að koma henni á blað. Opið er fyrir innsendingar í jólasmásagnakeppni Menningarstofu Fjarðabyggðar og allir nemendur í 1.–10. bekk grunnskóla sveitarfélagsins eru hvattir til að taka þátt.

Hugmyndaflugið má fara á flug og persónurnar geta verið af öllum stærðum og gerðum, úr þessum heimi eða öðrum. Eina skilyrðið um efnið er að sagan tengist jólunum, áramótunum eða hátíðunum í kringum þau með einhverjum hætti.

Síðasti skiladagur er föstudagurinn 4. desember.

Bókavinningar fyrir bestu sögurnar

Veitt verða verðlaun fyrir bestu sögurnar í þremur aldurshópum: yngsta stigi, miðstigi og elsta stigi. Í verðlaun eru bókavinningar frá Bjarti – Veröld, Sögum útgáfu og Óðinsauga.

Sigurvegarar verða tilkynntir 10. desember og verðlaunaafhending fer fram á bæjarskrifstofu Fjarðabyggðar. Vinningssögurnar birtast síðan á heimasíðu sveitarfélagsins í aðdraganda jóla.

Svona tekur þú þátt

  • Skrifaðu frumsamda sögu á íslensku, 150–1.500 orð að lengd.
  • Láttu söguna tengjast jólunum, áramótunum eða hátíðunum í kringum þau.
  • Myndskreytingar mega gjarnan fylgja.
  • Lestu söguna vel yfir og hugaðu að stafsetningu áður en þú sendir hana inn.
  • Sendu söguna sem tölvuskjal eða ljósmynd af handskrifuðum texta á menningarstofa@fjardabyggd.is.

Með sögunni þurfa að fylgja nafn höfundar, skóli og bekkur, ásamt nafni, netfangi og símanúmeri forráðamanna.

Náðu í blað og blýant eða opnaðu tölvuna. Við hlökkum til að sjá hvert jólaævintýrin ykkar leiða okkur!