Í kvöld, mánudaginn 10. ágúst kl. 20:00, stendur Hinsegin Austurland fyrir opnum fundi í Þingmúla í Valaskjálf á Egilsstöðum þar sem gestir frá Íslandi og erlendis fjalla um hinsegin málefni, réttindi, menningu og inngildingu.
Meðal frummælenda er Þórhildur Tinna Sigurðardóttir, fyrir hönd Menningarstofu Fjarðabyggðar, með erindið „Menning sem athvarf“.
Í erindinu fjallar Þórhildur um það hvernig menning og skapandi starf getur veitt börnum og ungu fólki athvarf, vettvang til sjálfstjáningar og tilfinningu fyrir því að tilheyra, sérstaklega þeim sem finna sig ekki endilega í hefðbundnu íþrótta- eða æskulýðsstarfi. Skapandi rými geta gefið ungu fólki tækifæri til að kanna eigin reynslu og sjálfsmynd á sínum eigin forsendum, um leið og þau styrkja sjálfstraust og tengsl við aðra.
Þórhildur byggir á reynslu sinni af menningarstarfi á Austurlandi og fjallar sérstaklega um mikilvægi slíkra rýma fyrir hinsegin börn og ungmenni. Bæði hinsegin samfélagið og skapandi samfélög á Austurlandi eru dreifð yfir stórt landsvæði og geta menningarviðburðir því orðið mikilvægir samkomustaðir þar sem ungt fólk hittir aðra með svipaða reynslu, myndar tengsl og upplifir sig sem hluta af stærra samfélagi.
Erindið verður flutt á ensku og byggir meðal annars á dæmum úr starfi Þórhildar hjá Menningarstofu Fjarðabyggðar og LungA. Hún mun einnig fjalla um mikilvægi þess að halda áfram að þróa aðgengileg og inngildandi skapandi tækifæri fyrir ungt fólk um allt Austurland.
Á dagskrá kvöldsins verða einnig erindi frá Ljubljana Pride, Intersex Íslandi, Samtökunum ’78 og Alcoa Fjarðaáli. Fundarstjóri er Urður Gunnarsdóttir, sérfræðingur í alþjóðastjórnmálum.
Í tilefni Hinsegin daga deilir Menningarstofa Fjarðabyggðar einnig myndbandi eftir Emblu Stencel, sem hún vann sem lokaverkefni sitt í Skapandi Sumarstörfum í sumar. Hægt er að horfa á myndbandið á samfélagsmiðlum Menningarstofu. Verkið fjallar um að tengjast aftur mennskunni á tímum þar sem heimurinn getur virst renna okkur úr greipum, um leið og það fagnar fjölskyldu, vináttu og fegurð lífsins.
Skapandi Sumarstörf er sumarstarfsverkefni fyrir ungt fólk á aldrinum 16–24 ára í Fjarðabyggð. Þátttakendur starfa með Menningarstofu, taka þátt í menningarstarfi víðs vegar um sveitarfélagið og vinna jafnframt að eigin skapandi verkefnum sem eru sýnd saman á lokasýningu í lok starfsins.
Menningarstofa Fjarðabyggðar óskar öllum gleðilegra Hinsegin daga og fagnar því mikilvæga hlutverki sem menning og sköpun gegna við að skapa rými fyrir sjálfstjáningu, tengsl og tilheyrandi.