Þegar barn þarf stuðning getur þjónusta margra aðila komið við sögu, meðal annars skóla, heilsugæslu og félagsþjónustu. Samþætting þjónustu í þágu farsældar barna snýst um að þessir aðilar vinni saman, bregðist snemma við og samræmi stuðninginn að þörfum barnsins og fjölskyldunnar.
Í Fjarðabyggð vinna tengiliðir og málstjórar farsældar með börnum, foreldrum og fagfólki að þessu markmiði. Áherslan er á að greina þörf fyrir aðstoð og fylgja stuðningnum eftir.
Hvert geta foreldrar og börn leitað?
Foreldrar og börn geta leitað beint til tengiliðar farsældar ef áhyggjur vakna af líðan eða aðstæðum barns. Tengiliður ræðir við barnið og foreldra, veitir ráðgjöf og leiðbeinir um næstu skref.
Hvar tengiliðurinn starfar fer eftir aldri og aðstæðum barnsins:
- Á meðgöngu og frá fæðingu fram að skólagöngu er tengiliður starfsmaður heilsugæslu.
- Í leik-, grunn- og framhaldsskóla er tengiliður starfsmaður skólans.
- Börn og ungmenni sem sækja ekki skóla eða falla á milli þessara þjónustukerfa hafa aðgang að tengilið hjá félagsþjónustu sveitarfélagsins.
Starfsfólk sem veitir börnum þjónustu á jafnframt að taka eftir vísbendingum um að þörfum barns sé ekki mætt, bregðast við og leiðbeina um samþættingu þjónustu.
Stuðningur eftir þörfum hvers barns
Þjónustan skiptist í þrjú stig eftir því hvers konar stuðningur er nauðsynlegur.
Á fyrsta stigi er grunnþjónusta sem stendur öllum til boða ásamt snemmtækum og einstaklingsbundnum stuðningi. Tengiliður tekur við beiðni foreldra um samþættingu þjónustu á þessu stigi, skipuleggur samstarfið og fylgir því eftir.
Á öðru stigi er veittur markvissari, einstaklingsbundinn stuðningur á grundvelli faglegs mats og stuðningsáætlunar.
Á þriðja stigi er stuðningurinn sérhæfðari og byggist á ítarlegu mati á þörfum barnsins.
Þegar úrræði á fyrsta stigi hafa verið fullreynd eða barn þarfnast umfangsmeiri stuðnings kemur málstjóri að málinu.
Barn og foreldrar taka þátt í samstarfinu
Málstjóri setur saman stuðningsteymi með fulltrúum þeirra sem veita barninu þjónustu. Foreldrar og, eftir atvikum, barnið sjálft eru hluti af teyminu.
Teymið vinnur að sameiginlegri stuðningsáætlun. Þar kemur fram hvert matið á þörfum barnsins er, hvaða markmiðum á að ná og yfir hvaða tímabil stuðningurinn nær. Einnig er ákveðið hvernig meta eigi árangur og fylgja þjónustunni eftir.
Þannig verður skýrara að hverju er unnið og hvernig þeir sem koma að stuðningnum eiga að vinna saman.
Reglulegt samstarf í Fjarðabyggð
Í Fjarðabyggð eru haldnir vikulegir teymisfundir málstjóra. Að samstarfinu koma félagsráðgjafar, sálfræðingur í skólaþjónustu, kennsluráðgjafi, starfsfólk barnaverndar og fjölskylduráðgjafi.
Teymið vinnur náið með leik- og grunnskólum sveitarfélagsins og málstjórar hafa viðveru í skólunum í hverjum mánuði. Verkefnastjóri farsældar fundar einnig mánaðarlega með tengiliðum leik- og grunnskóla. Þá fer fagteymi farsældar mánaðarlega yfir nýjar beiðnir um samþætta þjónustu á öðru stigi.
Markmiðið er að börn og fjölskyldur fái stuðning við hæfi og að þeir sem veita þjónustuna vinni saman með hagsmuni barnsins að leiðarljósi.