Íslensku menntaverðlaunin voru afhent við hátíðlega athöfn 10. nóvember. Verðlaunin eru veitt fyrir metnaðarfullt og vandað skóla- og frístundastarf og framúrskarandi umbætur á sviði menntunar.
Söngvavor hófst í Reykjavík árið 2010 en hefur á undanförnum árum breiðst út um landið. Markmið verkefnisins er að efla sönggleði, sjálfstraust, málþroska og menningarþátttöku elstu barna leikskólanna. Á hverju ári kynnast börnin tónlist íslensks tónskálds, læra lög þess og vinna með textana í fjölbreyttu leikskólastarfi. Verkefninu lýkur með uppskerutónleikum þar sem börnin stíga á svið og flytja lögin.
Söngvavor á Austurlandi
Menningarstofa Fjarðabyggðar leiddi innleiðingu Söngvavors á Austurlandi vorið 2024 í samstarfi við alla leikskóla Fjarðabyggðar og leikskólana Tjarnarskóg og Hádegishöfða í Múlaþingi. Síðan hefur samstarfið þróast og vorið 2026 bættist Tónlistarskólinn á Egilsstöðum við verkefnið.
Árlega eru haldnir tvennir uppskerutónleikar á Austurlandi, annars vegar í Eskifjarðarkirkju og hins vegar í Sláturhúsinu á Egilsstöðum. Árið 2025 var tónlist Braga Valdimars Skúlasonar í forgrunni og vorið 2026 kynntust börnin lögum Dr. Gunna. Næsta vor verður tónlist Olgu Guðrúnar Árnadóttur í aðalhlutverki.
Söngvavor hefur vaxið hratt á landsvísu. Vorið 2026 tóku 2.746 leikskólabörn og um 300 hljóðfæranemendur þátt í verkefninu, alls frá 140 leikskólum og 15 tónlistarskólum.
Fjarðabyggð óskar öllum sem komið hafa að Söngvavori innilega til hamingju með viðurkenninguna, ekki síst leikskólum, tónlistarskólum, kennurum, nemendum og Menningarstofu Fjarðabyggðar.
