Guillaume Bazard, sendiherra Frakklands á Íslandi, bauð Jónu Árnýju Þórðardóttur, bæjarstjóra Fjarðabyggðar, til árlegrar móttöku franska sendiráðsins í tilefni af þjóðhátíðardegi Frakka.
Bazard hefur gegnt embætti sendiherra Frakklands á Íslandi frá árinu 2022 en er nú að ljúka störfum hér á landi.
Góð tengsl hafa myndast milli sendiherrans og Fjarðabyggðar á undanförnum árum. Bazard heimsótti meðal annars Fáskrúðsfjörð á Frönskum dögum árið 2024, dvaldi þar yfir hátíðina og tók þátt í dagskrá hennar. Til stóð að hann kæmi einnig á Franska daga í sumar en vegna heimsóknar utanríkisráðherra Frakklands til Íslands á sama tíma átti hann þess ekki kost.
Í móttökunni færði Jóna Árný sendiherranum blómvönd fyrir hönd Fjarðabyggðar, þakkaði honum fyrir ánægjuleg kynni og gott samstarf á liðnum árum og óskaði honum velfarnaðar á nýjum vettvangi.