Unnið er að uppsetningu nýrra grenndarstöðva í Fjarðabyggð þar sem íbúar geta komið með flokkaðan úrgang til endurvinnslu.
Búið er að setja upp og merkja fyrstu grenndarstöðina, en hún er staðsett á Fáskrúðsfirði. Tvær stöðvar til viðbótar verða tilbúnar fljótlega uppúr næstu viku þegar framkvæmdum við þær verður lokið. Þær eru staðsettar í Neskaupstað og á Eskifirði.
Grenndarstöðvar verða staðsettar við móttökustöðvar í öllum kjörnum nema á Breiðdalsvík. Þar verður grenndarstöðin staðsett við þjónustumiðstöðina á Breiðdalsvík til að byrja með.
Verkinu verður fram haldið á næstu vikum og er stefnt að því að allir stöðvar verði tilbúnar eigi síðar en um miðjan júní.
Á grenndarstöðvunum verður hægt að skila eftirfarandi úrgangsflokkum:
- pappír
- textíl
- plasti
- málmi
- gleri
- kertavaxi
- rafhlöðum
Grenndarstöðvarnar eru liður í því að bæta aðgengi íbúa að flokkun og endurvinnslu og gera öllum auðveldara að koma verðmætum úrgangi í réttan farveg.