Fara í efni
17.11.2026 Fréttir, Menning og mannlíf

Bergrún Íris leiðir ritlistarsmiðjur í Fjarðabyggð

Deildu

Hvaðan koma hugmyndir að sögum, hvernig verða persónur til og þurfa allar sögur að enda vel? Þessum spurningum og fleirum verður velt upp í ritlistarsmiðjum sem verðlaunarithöfundurinn Bergrún Íris Sævarsdóttir leiðir á Reyðarfirði og Fáskrúðsfirði miðvikudaginn 25. nóvember.

Í smiðjunum fá þátttakendur að spreyta sig á skapandi skrifum og persónusköpun undir leiðsögn Bergrúnar, sem hefur getið sér gott orð fyrir barnabækur sínar, bæði sem höfundur og myndhöfundur. 

/cdn/media/Menningarstofa/Mynd-2.jpeg?v=1794913694
Frá ritlistarsmiðju í umsjón Bergrúnar. 

„Í smiðjunni fá þátttakendur tækifæri til að skapa persónu, bæði í orðum og myndum, sem hægt er að vinna áfram með eftir að smiðjunni lýkur,“ segir Bergrún Íris.

Smiðjurnar fara fram á bókasöfnunum á Fáskrúðsfirði og Reyðarfirði og eru öllum opnar. Þátttaka er án endurgjalds en nauðsynlegt er að skrá sig með tölvupósti á menningarstofa@fjardabyggd.is.

Heimsókn Bergrúnar er hluti af fjölbreyttri bókmenntadagskrá í Fjarðabyggð í tengslum við Rithöfundalestina, sem fer um Austurland dagana 25.–29. nóvember. Auk opnu smiðjanna heimsækir hún grunnskóla í sveitarfélaginu og tekur þátt í upplestrum.

/cdn/media/Mynd-3.jpeg?v=1794913785
Bergrún Íris Sævarsdóttir, barnabókahöfundur. 

Bergrún verður meðal höfunda sem koma fram á upplestrarkvöldi á Franska safninu á Fáskrúðsfirði föstudaginn 27. nóvember kl. 20 og á bókmenntaviðburði í Dalahöllinni á Norðfirði laugardaginn 28. nóvember. Í Dalahöllinni les Bergrún upp ásamt Særúnu Hlín Laufeyjardóttur á sérstökum barna- og ungmennaupplestri kl. 13 og á almennum upplestri með öðrum rithöfundum Rithöfundalestarinnar kl. 14. 

Ritlistarsmiðjur miðvikudaginn 25. nóvember

  • Bókasafnið á Reyðarfirði: kl. 15:00
  • Bókasafnið á Fáskrúðsfirði: kl. 17:00

Skráning: menningarstofa@fjardabyggd.is