Verkefnið á rætur sínar að rekja til rannsókna Helgu á Völvuleiði fyrir ofan Reyðarfjörð og Eskifjörð, en þaðan hefur vinnan undið upp á sig og orðið að stærri vefnaði sem samanstendur af minningum, dulspeki, goðafræði, landslagi og persónulegri reynslu.
Í verkunum verður völvan að þræði í gegnum þessa ólíku heima. Myndefni, fundnir hlutir, náttúrugripir og hljóð sem Helga hefur safnað í og í kringum Neskaupstað og á ferðum sínum um Austurland fléttast saman við rannsóknir hennar og handverk. Hún særir fram augnablik þar sem hið hversdagslega verður framandi, töfrum hlaðið eða órætt.
Einkasýning Helgu VÖLVUMYRKVI: she who helps us see past corners er í sýningarstjórn Þórhildar Tinnu Sigurðardóttur. Sýningaropnun verður laugardaginn 29. ágúst kl. 14:00 í Þórsmörk, Neskaupstað. Hún stendur opin til 31. október.