NEFNDIR OG RÁÐ
Bæjarráð Fjarðabyggðar fer ásamt bæjarstjóra með framkvæmdastjórn og fjármálastjórn sveitarfélagsins að því leyti sem þessi mál eru ekki öðrum falin. Bæjarráð hefur eftirlit með stjórnsýslu sveitarfélagsins og fjármálastjórn þess, semur drög að fjárhagsáætlun og viðaukum við hana og leggur þau fyrir sveitarstjórn. Þá sér bæjarráð um að ársreikningar sveitarfélagsins séu gerðir og lagðir fyrir bæjarstjórn til meðferðar og afgreiðslu.
Aðalmenn og varamenn í bæjarráði eru kjörnir úr hópi aðalmanna í bæjarstjórn, sem jafnframt kýs formann og varaformann bæjarráðsins. Þá kýs bæjarstjórn fulltrúa í fastanefndir eftir því sem fyrir er mælt í lögum og samþykkt um stjórn Fjarðabyggðar. Kjörtímabil fastanefnda er hið sama og bæjarstjórnar, nema annað leiði af lögum eða samþykktum um stjórn sveitarfélagsins.
Fastanefndir eru samkvæmt samþykkt um stjórn Fjarðabyggðar sjö talsins og sinna faglegu starfi hver á sínu málefnasviði. Þær eru menningar- og nýsköpunarnefnd, barnaverndarnefnd, eigna-, skipulags- og umhverfisnefnd, félagsmálanefnd, fræðslunefnd, íþrótta og tómstundanefnd og hafnarstjórn.
Undirnefndir fastanefnda og nefndir með afmörkuð málefni eru framkvæmdaráð hjúkrunarheimila, landbúnaðarnefnd, safnanefnd og upplýsingaöryggisnefnd. Auk þess er ungmennaráð skipað fulltrúum skv. samþykktum þess.
Bæjarstjórn ákveður valdsvið nefnda, ráða og stjórna sem hún kýs nema slíkt sé ákveðið í lögum. Fjallað er um störf bæjarráðs og fastanefnda í samþykkt um stjórn Fjarðabyggðar.