16. fundur fræðslunefndar

1.

1411075 - Fjarðabyggð til framtíðar

Fyrir liggur tillaga bæjarráðs um fyrirkomulag stjórnunar í leik- og grunnskólum á Fáskrúðsfirði og Stöðvarfirði og ósk um umsögn fræðslunefndar. Enn fremur óskar bæjarráð eftir umræðu fræðslunefndar um hugmynd úr skýrslu Skólastofunnar ehf. um aukna samkennslu í tónlistarskólum Fjarðabyggðar. Fræðslunefnd gerir ekki athugasemdir við tillögur bæjarráðs aðrar en þær að bæta u.þ.b. framan við 0,3 stöðugildi. Nefndin leggur áherslu á mikilvægi þess að framkvæmdin verði með þeim hætti að skólahald eflist hvað varðar innra starf skólanna á Fáskrúðsfirði og Stöðvarfirði. Rædd var aukin samkennsla í tónlistarskólum Fjarðabyggðar út frá skýrslu Skólastofunnar. Fræðslunefnd er sammála því að leitað verði samráðs við tónlistarskólana um aukna samkennslu.

2.

1505010 - Komdu þínu á Framfæri - Ráðstefna Æskulýðsvettvangsins

Lögð var fram til kynningar skýrsla sem unnin var af Æskulýðsvettvangnum fyrir m.a. Fjarðabyggð. Í skýrslunni má finna helstu óskir og áherslur ungs fólks í sveitarfélaginu þegar kemur að tómstunda-, æskulýðs- og fræðslumálum. Sérstaklega var farið yfir hugmyndir unga fólksins sem snéru að fræðslumálum. Unga fólkið var í stórum dráttum ánægt með framboð á menntun í heimabyggð, m.a. fjölbreyttu vali og verklegri kennslu, en þau komu einnig með ábendingar um það sem betur mætti fara. Ábendingarnar snéru að auknu framboði á tungumálanámi, leiklist og dansi, fjármálalæsi, menningarferðum í tengslum við skóla, gerð skólamáltíða, bættri aðstöðu fyrir hljómsveitir o.fl. Fræðslunefnd þakkar fyrr skýrsluna og þá vinnu sem ungmenni lögðu á sig í tengslum við gerð hennar. Fræðslunefnd vísar ábendingum sem fram koma í skýrslunni til vinnu við starfs- og fjárhagsáætlun 2016.

3.

1505062 - Fyrirspurn vegna atviks í leikskóla

Trúnaðarmál: Fyrir liggur bréf til fræðslustjóra og fræðslunefndar vegna atviks í leikskóla í Fjarðabyggð. Fræðslustjóri greindi nefndinni frá því hvernig unnið hefði verið í málinu. Fræðslunefnd felur fræðslustjóra að fylgja málinu eftir.

4.

1504178 - Aukið nemendalýðræði varðandi val á mat sem boðið er upp á í grunnskólunum

Vísað er til fræðslunefndar tillögu frá ungmennaráði Fjarðabyggðar um aukið nemendalýðræði við val á mat í mötuneytum grunnskóla. Ungmennaráð Fjarðabyggðar lagði til við bæjarstjórn að nemendalýðræði varðandi val á mat í grunnskólum yrði aukið. Í greinargerð ungmennaráðsins segir að slíkar lýðræðisumbætur megi útfæra á margan hátt og erfitt sé að segja að ein rétt leið sé fær í þessum efnum. Til dæmis megi skipa sérstakan hóp nemenda í hverjum skóla sem fengi það hlutverk að vera ráðgefandi þegar kemur að því að semja matseðil fyrir vikuna, mánuðinn eða önnina. Þá má einnig hafa einn dag í viku þar sem nemendurnir sjálfir velja hvað er í matinn með kosningu á milli t.d. 5 valmöguleika. Það er mat ungmennaráðs að aukið nemendalýðræði þurfi hvorki að kosta meira fé né koma niður á hollustu eða gæðum matarins. Grunnskólanemendur í Fjarðabyggð séu flestir mjög meðvitaðir um hollt mataræði og vilji ekki ruslfæði þó þeir hafi vissulega ákveðin smekk og kjósi fremur að næra sig á hollum mat sem þeim finnst bragðgóður. Ungmennaráð tók einnig fram að þetta megi ekki túlka sem gagnrýni á þann mat sem hefur verið á boðstólum því yfirleitt hefur hann verið mjög fínn. Málið snýst um að auka lífsgæði og val nemenda þannig að þeir fái að velja það besta sem efni og kostir leyfa. Fræðslunefnd tekur vel í hugmyndina og felur fræðslustjóra að vinna að framgangi málsins með skólastjórum grunnskóla og framleiðendum skólamáltíða í grunnskólum Fjarðabyggðar.