Í kjölfarið á boðuðum breytingum á fræðslumálum í Fjarðabyggð hefur umræða átt sér stað í fjölmiðlum og á samfélagsmiðlum. Sveitarfélagið hefur meðal annar átt samtal við stéttarfélög og Samband íslenskra sveitafélaga, auk þess er málefnið til umfjöllunar í Mennta- og barnamálaráðuneytinu. Beðið er eftir áliti ráðuneytisins, áður en málið er tekið til umfjöllunar að nýju hjá Fjarðabyggð.
12.04.2024
Vegna umfjöllunar um breytingar í fræðslumálum
Að gefnu tilefni vill sveitarfélagið koma því á framfæri að ákvörðunin er tekin í bæjarstjórn Fjarðabyggðar að undangenginn vinnu kjörinna fulltrúa sem hófst í september 2023 og staðið hefur síðan. Þar ákvað bæjarstjórn að hefja vinnu við að endurskoða fræðslumál með það fyrir augum að rýna í breytt fyrirkomulag á rekstri leik-, grunn- og tónlistarskóla með það fyrir augum að auka rekstrarlega samlegð og bæta faglegt starf. Starfsfólk sveitarfélagsins hefur unnið í samræmi við ákvörðun bæjarstjórnar hverju sinni. Ákvörðunin er bæjarstjórnar einnar og ósanngjarnt er að draga einstaka starfsmenn sveitarfélagsins í sviðsljósið vegna ákvarðana sem eru ekki þeirra, eins og dæmi eru um.
Starfsfólk fjölskyldusviðs hefur unnið að heilindum í þeim verkefnum sem þeim hefur verið falið í gegnum tíðina. Þá hefur það ávallt verið leiðarljós kjörinna fulltrúa Fjarðabyggðar að stuðla að umbótum á þessu sviði og horfa til framtíðar í takt við þróun og breytingar í samfélaginu hverju sinni, ekki síst í ljósi þess að sveitarfélögin fara með ábyrgð á málaflokknum hvert um sig. Þá er það vilji sveitarfélagsins að nýta gagnrýni til að bæta ferlið svo loka niðurstaðan verði góð, okkur öllum sem sveitarfélagið byggja til hagsbóta.