Flutningaskipið Green Freezer strandaði á skeri í Fáskrúðsfirði um klukkan átta í gærkvöld. Mengunargirðing hefur verið dregin á strandstað, en örfín brák gerði vart við sig í morgun við skipið.

Útgerð skipsins vinnur að björgun þess, en gangi það ekki eftir metur Landhelgisgæslan hvort íhlutunarrétti verði beitt, í samræmi við lög um varnir gegn mengun hafs og strandar.

Green Freezer var á leið inn á Fáskrúðsfjörð að sækja afurðir, en sökum vélarbilunar bakkaði skipið upp í fjöruna við Eyri.

Björgunarsveitir á Austurlandi voru kallaðar út, þar með talið björgunarbáturinn Geisli og aðrir bátar allt frá Vopnafirði til Hornafjarðar. Um 60 björgunarmenn hafa verið á vettvangi. Þyrla landhelgisgæslunnar kom á strandstað í gærkvöld. Þá er varðskipið Þór væntanlegt um sjö leytið í kvöld. Grétar Helgi Geirsson er vettvangsstjóri aðgerða.

Fjölveiðiskip Samherja kom taug um borð í Green Freezer og heldur björgunarbáturinn Hafdís frá Fáskrúðsfirði skipinu við. Þá er dráttarbátuinn Vöttur kominn á strandstað.

Skipið er stöðugt á eyrinni og situr á mjúkum sandbakka sunnanmegin í firðinum.

Green Freezer er hér á landi á vegum Nesskipa. Skipið er í eigu Green Management í Póllandi, en er skráð á Bahama-eyjum. Það hefur verið í siglinum á milli Íslands og Rússlands með fisk.