Hin árlega götuþríþraut fer fram á  Eskifirði um sjómannadagshelgina, laugardaginn 31.maí frá klukkan 8:00 – 13:00. Þetta er í fimmta skipti sem keppnin fer fram og er hún sniðin bæði fyrir börn og fullorðna.

Alls eru 87 þátttakendur skráðir til leiks og hafa þeir aldrei verið fleiri.

Keppt í sundi, hjólreiðum og hlaupi í nokkrum flokkum, barna og fullorðinna, bæði í einstaklings- og liðakeppni.

Einnig er fjölskylduflokkur þar sem börn geta tekið þátt í liði með einum fullorðnum.

Gríðarlega mikil stemning hefur myndast hjá fjölskyldum að taka þátt og gaman að sjá börn og fullorðna taka þátt saman, í viðburði sem slíkum.

Keppnin hefur heppnast gríðarlega vel síðustu 4 ár og eru þátttakendur alls staðar að af landinu þó mest héðan af Austurlandi.

Það er áhugafólk sem stendur fyrir viðburðinum og rennur allur ágóði til uppbyggilegs starfs ungs fólks á Austurlandi, nú æskulýðsfélaga Þjóðkirkjunnar.

Flokkar sem keppt er í:

Super sprint (ætlað börnum og liðakeppni) 

• 400 m sund 
• 10 km hjól
• 2,5 km hlaup 

Ætlað börnum sem hafa lokið 1. bekk til þeirra sem hafa lokið 7. bekk. Hámark 1 fullorðinn í liði (fullorðinn miðast við einstakling sem hefur lokið 8. bekk).

Sprint (Einstaklings og liðakeppni)

• 750 m sund 
• 20 km hjól
• 5 km hlaup

Olympic (Einstaklings og liðakeppni)

• 1500 m sund
• 40 km hjól
• 10 km hlaup

Nánari upplýsingar á gotu3.com eða hjá Díönu Mjöll í síma 893 4936.