Vilhjálmur Hjálmarsson, bóndi, fyrrverandi þingmaður og menntamálaráðherra, lést 14. júlí á heimili sínu Brekku í Mjóafirði. Vilhjálmur var 99 ára.
Vilhjálmur Hjálmarsson er látinn
Vilhjálmur Hjálmarsson, bóndi og fyrrverandi þingmaður og menntamálaráðherra lést 14. júlí á heimili sínu Brekku í Mjóafirði, 99 ára að aldri.
Vilhjálmur var fæddur á Brekku 20. september 1914, sonur Hjálmars Vilhjálmssonar og Stefaníu Sigurðardóttur. Vilhjálmur var kvæntur Önnu Margréti Þorkelsdóttur, sem lést 21. apríl 2008. Þau eignuðust fimm börn: Hjálmar (látinn 2011), Pál, Sigfús Mar, Stefán og Önnu. Barnabörn Vilhjálms og Margrétar eru 18, barnabarnabörnin 35 og barnabarnabarnabörnin fimm og tvö á leiðinni.
Vilhjálmur lauk héraðsskólaprófi frá Laugarvatni 1935. Hann stundaði búskap í um 30 ár, kenndi við barnaskólann í Mjóafirði og sinnti auk þess ýmiss konar félagsmálastörfum. Vilhjálmur sat lengi á Alþingi fyrir Framsóknarflokkinn, fyrst árið 1949, og gegndi embætti menntamálaráðherra 1974–1978. Þegar þingsetu Vilhjálms lauk árið 1979 tóku ritstörf við. Samtals komu út eftir hann 24 bækur sem hann skrifaði sjálfur og þrjár sem hann átti hlutdeild í.
Sú síðasta, Örnefni í Mjóafirði, kemur út 20. september nk. en þá hefði Vilhjálmur átt 100 ára afmæli.