Í dag föstudaginn 26.nóvember verður kveikt á jólatrjám í bæjarkjörnum sveitarfélagsins. Undanfarin ár hefur sú skemmtilega hefð skapast að tendra ljósin á jólatrjám Fjarðabyggðar við hátíðlega athöfn í hverjum byggðakjarna. Vegna þeirra takmarkana á samkomuhaldi sem í gildi eru um þessar mundir, vegna COVID 19, er ljóst að ekki verður hægt að halda slíkar athafnir í ár.
26.11.2021
Tendrun jólatrjáa í Fjarðabyggð og aðventustundir í skólum
Því hefur verið ákveðið líkt og á síðasta ári, að óska eftir við leik- og grunnskóla að hver skóli haldi notalega aðventustund á skólatíma þar sem boðið verður upp á ávexti og piparkökur. Skólarnir hafa tekið vel í þessa tillögu og því mun hver skóli halda smá viðburð vegna þessa á næstu dögum. Fjarðabyggð mun að venju útvega ávexti og piparkökur og dreifa í allar skólastofnanir.
Starfsmenn Fjarðabyggðar vinna einnig þessa dagana hörðum höndum að því að skreyta bæjarkjarnana og víða hafa verið settar upp skreytingar á ljósastaura.