í dag undirritaði Jón Björn Hákonarson, bæjarstjóri Fjarðabyggðar og Árný Hafborg fyrir hönd AHA Bygg viljayfirlýsingu um aukið húsnæðisframboð í Fjarðabyggð. Markmiðið með yfirlýsingunni er að stuðla að uppbyggingu á nýjum íbúðum og íbúðarhúsum í Fjarðabyggð upp að 100 fermetrum að stærð, með gæði og hagkvæmni í huga með tengingu við náttúru og útivist.
09.03.2023
Viljayfirlýsing um aukið húsnæðisframboð í fjarðabyggð undirritað
Fjarðabyggð vill stuðla að fjölbreyttu framboði húsnæðis sem hæfir húsnæðismarkaðnum og tryggja framtíðarvöxt Fjarðabyggðar.
Gert er ráð fyrir samstarfi milli aðila sem til framtíðar litið getur skilað sér í uppbyggingu á allt að 105 íbúðum og þar af 9 fjölbýli.
Áform AHA Bygg er um byggingu almennra íbúða sem ætlaðar eru til sölu og leigu á almennum markaði á fjórum stöðum í Fjarðabyggð:
- í Neskaupstað er stefnt að byggingu 7 húsa um 40 - 80 fm auk tveggja fjölbýlishúsa með allt að 16 íbúðum.
- Á Reyðarfirði er stefnt að byggingu þriggja fjölbýlishúsa með allt að 18 íbúðum. Auk þess sem Fjarðabyggð og AHA Bygg vinni sameiginlega að því að kanna möguleika á að gera skipulag að hverfi sem henti fyrir 20 hús frá 40 til 80 fm.
- Á Eskifirði er stefnt að byggingu allt að 12 húsa frá 40 til 80 fm og tveggja fjölbýlishúsa með allt að 16 íbúðum.
- Á Fáskrúðsfirði verði unnið sameiginlega að því kanna möguleikann á að gera skipulagt hverfi sem hentar fyrir tvö fjölbýlishús með allt að 16 íbúðum.
Yfirlýsingin gildir í eitt ár frá undirskrift, fyrir 15. desember verður haldinn fundur milli aðila þar sem árangur verkefninsins verður metin, og rætt um framlengingu viljayfirlýsingarinnar til eins árs í viðbót.