Á vef Veðurstofu í dag má sjá að spáð er áframhaldandi talsverðri rigningu fram undir miðnætti í kvöld og styttir þá upp að mestu en spáð er skúrum á morgun.
02.09.2025
Skriðuföll og vatnsagi á Austfjörðum
Þegar rignir af slíkri ákefð eins og í dag eykst yfirborðsrennsli hratt og vatn safnast í lækjarfarvegum. Með auknu rennsli eykst rof innan farvega og vatn litast mórautt. Aukið rennsli getur líka haft áhrif á stöðugleika árbakka og litlar fyllur eða skriðuspildur falla í læki og framburður lækja getur litað firði brúna eins og sést víða á Austfjörðum í dag.
Auknar líkur eru á skriðuföllum, svo sem grjóthruni, aurskriðum eða aurflóðum í lækjarfarvegum. Þar sem vegir liggja undir bröttum hlíðum getur verið hætta á skriðum og grjóthruni á vegi. Bent er á að fólk sýni aðgát þegar ferðast er undir bröttum hlíðum, horfi í kringum sig og forðist að dvelja lengi innan og neðan farvega. Auk þess þarf að hafa í huga að skriður geta fallið eftir að mesta ákefð rigningar er afstaðin.
Skriðuvakt Veðurstofunnar fylgist sem fyrr náið með mælitækjum á Seyðisfirði og Eskifirði.
Skriðuvakt Veðurstofunnar mun fylgjast með aðstæðum en til þess að geta lagt betur mat á aðstæður er mikilvægt fyrir Veðurstofuna að fá tilkynningar um skriður og grjóthrun. Hægt er að hafa samband í síma 522-6000 á opnunartíma skiptiborðsins (https://www.vedur.is/um-vi/hafa-samband/) eða senda tölvupóst með upplýsingum á netfangið skriduvakt@vedur.is. Gott er að láta fylgja mynd af skriðunni/grjóthruninu og nákvæma staðsetningu auk tímasetningar, hvenær skriðan féll eða hvenær fólk varð vart við hana. Einnig er hægt að tilkynna grjóthrun og skriður með þessu formi hér.