Bæjarráð

Umræða tekin um ársreikning Fjarðabyggðar og stofnana 2012.
Fjármálastjóri var í símasambandi við fundinn og fór hann yfir rekstur sjóðs sveitarfélagsins á árinu 2012.

Lögð fram umferðaröryggisúttekt á Nesgötu í Neskaupstað vegna fyrirhugaðs leikskóla dagsett 3. apríl 2013. Úttektin var unnin af verkfræðistofunni Mannvit. Eigna-, skipulags- og umhverfisnefnd vísaði úttektinni til umræðu í bæjarráði og óskar jafnframt eftir umsögn bæjarráðs og fræðslu- og frístundanefndar.
Bæjarráð felur eigna-, skipulags- og umhverfisnefnd að útfæra fleiri tillögur að deiliskipulögum og jafnframt að ræða við hlutaðeigandi aðila tengdum uppbyggingu nýs leikskóla.
Bókun frá Elvari Jónssyni vegna deiliskipulags á Neseyri.
Undirritaður ítrekar þá afstöðu sína sem áður hefur verið bókuð, m.a. á bæjaráðsfundi nr. 314, að Nesgata færist suður fyrir fyrirhugaðan leikskóla áður en nýtt leikskólahúsnæði verður tekið í notkun. Úttektin breytir ekki þeirri afstöðu.

Boðað er til aðalfundar Sparisjóðs Norðafjarðar 18. apríl nk.
Bæjarráð samþykkir að Valdimar O. Hermannsson fari með umboð Fjarðabyggðar á aðalfundinum.

Framlagt bréf frá Opus lögmönnum vegna lóðarinnar Árdals 19 á Eskifirði.
Bæjarritara falið að svara erindi lögfræðistofunnar.

Framlagt minnisblað fræðslustjóra um fjölgun á starfsdögum í leikskólum Fjarðabyggðar úr fjórum í fimm en minnisblað er tilkomið vegna endurskoðunar á skólanámskrám leikskóla og óskað er eftir að bætt verði við einum starfsdegi næstu tvö skólaár.
Bæjarráð felur bæjarstjóra að fara yfir starfsdaga leikskóla með fræðslustjóra og leggja minnisblað fyrir bæjarráð.

Málefni Atvinnuþróunarsjóðs Austurlands rædd og framtíð starfsemi sjóðsins.
Bæjarráð óskar eftir endanlegum drögum að nýjum samþykktum sjóðsins frá stjórn Austurbrúar.
Bæjarráð samþykkir að framlög til sjóðsins vegna ársins 2013 verði greidd. Tekið af liðnum óráðstafað 21 - 69 alls kr. 3.805.038.

Framlagt bréf til bæjarstjóra um nýtingu húsnæðisins að Hafnarbraut 2 í Neskaupstað fyrir íbúa 60 ára og eldri frá Lilju Dögg Vilbergsdóttur, Önnu Þóru Árnadóttur og Jónu Lind Sævarsdóttur.
Bæjarstjóra falið að skoða málið og einnig málefni Hulduhlíðar þessu tengt.

Framlagt bréf Þórarins Árna Hafdals Hávarðssonar þar sem hann býður til sölu kaup á myndefni úr Fjarðabyggð.
Vísað til markaðs- og upplýsingafulltrúa til skoðunar og umfjöllunar í atvinnu- og menningarnefnd.

Framlagt opið bréf Sigurjóns Hjálmarssonar sem fjallar m.a. um álagningu fasteignaskatta í Fjarðabyggð og fjárhagsaðstoð.
Vísað til bæjarstjóra og umræðu í félagsmálanefnd.

Þennan dagskrárlið fundar sátu Jón G Kristjánsson framkvæmdastjóri Lífeyrissjóðs sveitarfélaga þar sem farið var yfir gögn er varða sameiningu Lífeyrissjóðs Neskaupstaðar og fimm annara lífeyrissjóða við Lífeyrissjóð starfsmanna sveitarfélaga.
Kynntar niðurstöður sameiningarnefndar sem leggur til við stjórn sjóðsins að þeir verði sameinaðir. Stjórn Lífeyrissjóðs Neskaupstaðar fundar síðar í dag að aflokinni kynningu með Starfsmannafélagi Fjarðabyggðar þar sem afstaða verður endanlega tekin til sameiningar.
Bæjarráð samþykkir sameininguna fyrir sitt leyti.

Kjörskrárstofn fyrir Fjarðabyggð vegna Alþingiskosninga 27. apríl nk. lagður fram til kynningar.
Bæjarstjóra falið að vinna kjörskrárstofn og leggja fyrir bæjarstjórnarfund, sem haldinn verður 17. apríl nk., til staðfestingar.

Fundargerð fræðslu- og frístundanefndar frá 10. apríl sl. lögð fram til kynningar.

Fundargerð atvinnu- og menningarnefndar frá 13. apríl sl. lögð fram til kynningar.

Fundargerð eigna-, skipulags- og umhverfisnefndar frá 8. apríl sl. lögð fram til kynningar.

Fundargerð hafnarstjórnar frá 9. apríl sl. lögð fram til kynningar.

Fundargerð félagsmálanefndar frá 9. apríl lögð fram til kynningar.