Bæjarráð

Framlögð beiðni um styrk vegna endurgerðar Kaupvangs að Hafnargötu 15 á Fáskrúðsfirði. Jafnframt lagt fram minnisblað frá skipulags- og byggingarfulltrúa. Bæjarráð samþykkir styrkbeiðni og felur fjármálasviði að ganga frá styrk m.v. fyrirliggjandi reglur.

Ferðaþjónustan á Móeyri hefur sótt um að byggja sex smáhýsi á Mjóeyri ásamt því að stækka lóð um 1.844 m2.
Eigna- skipulags- og umhverfisnefnd hefur samþykkt umsóknina fyrir sitt leyti. Bæjarráð samþykkir stækkun lóðar og byggingu smáhýsa.

Framlagt minnisblað eigna- og framkvæmdafulltrúa vegna beiðni um aukafjárveitingu vegna framkvæmda við húsnæði Tónskóla Neskaupstaðar. Bæjarráð felur fjármálastjóra að útbúa viðauka við fjárhagsáætlun 2014 vegna framkvæmdanna. Vísað til afgreiðslu bæjarstjórnar.

Framlögð matsgerð og kaupsamningur vegna uppkaupa á fasteigninni að Túngötu 13 á Eskifirði vegna ofanflóðavarna en fasteignin er á skilgreindu hættu/framkvæmdasvæði við Lambeyrará. Ofanflóðasjóður greiðir 90% kaupverðs. Bæjarráð staðfestir kaupverð kr. 22.500.000 og felur bæjarstjóra afgreiðslu málsins.

Upplýsingar um íbúafund sem haldinn verður á Stöðvarfirði miðvikudaginn 5.febrúar kl. 17:30. Á dagskrá fundarins er kynning á hugmyndum um Þokusetur auk þess sem rætt verður um atvinnumál á Stöðvarfirði. Fulltrúar Austurbrúar og Fjarðabyggðar verða á fundinum.

Framlagt minnisblað bæjarritara þar sem lagt er til að Fjarðabyggð semji við IBM Danmark um fjármögnun á tölvubúnaði fyrir 600.000 DKK til þriggja ára. Bæjarráð samþykkir tillögu í minnisblaði en gert er ráð fyrir útgjöldum í fjárhagsáætlun 2014.

Gerð grein fyrir stefnu á hendur sveitarfélaginu vegna greiðslu sérstaks þrekálags til slökkviliðsmanna.

Lagt fram svar bæjarritara vegna svara við fyrirspurnum Ásmundar Ásmundssonar í sjö liðum. Bæjarritara falið að svara bréfritara.

Framlögð til kynningar stefna landeigenda Stuðla vegna landamerkja jarðarinnar og Sléttu. Fjarðabyggð á ekki beina aðild að málinu. Vísað til vinnslu hjá forstöðumanni stjórnsýslu og til kynningar í eigna- skipulags- og umhverfisnefnd.

Framlagt bréf Öglu Hauksdóttur vegna hitaveitu á Eskifirði. Framkvæmdasviði falið að finna úrlausn á málinu og því vísað til kynningar í eigna- skipulags- og umhverfisnefnd.

Bæjarstjóri gerði grein fyrir kynningarfundi um starfsemi Eignarhaldsfélags Brunabótafélags Íslands.

Framlagt bréf frá Sambandi íslenskra sveitarfélaga um tilraunaverkefni vegna rafrænna íbúakosninga. Þjóðskrá Íslands mun halda sérstakan kynningarfund fyrir sveitarfélögin 5. febrúar nk. kl 13:30 og verður bein útsending af fundinum.

Umræða um reglur varðandi sölu íbúða í eigu Fjarðabyggðar. Máli vísað til framkvæmdasviðs og eigna- skipulags- og umhverfisnefndar.

Kristín Björg Albertsdóttir forstjóri Heilbrigðisstofnunar Austurlands sat þennan lið fundarins. Kristín gerði m.a. grein fyrir fjárlögum heilbrigðisstofnunar fyrir árið 2014, ræddi uppsafnaðan halla síðastu ára og helstu aðgerðir til að takast á við rekstrarvanda stofnunarinnar.

Þennan lið fundarins sat fræðslustjóri. Rætt um fyrirkomulag sumarlokunar á leikskólum Fjarðabyggðar sumarið 2014. Bæjarráð er sammála um að sumarlokun taki mið af starfsáætlun 2014 en þar er horft til hagsmuna stærri fyrirtækja sem sækja vinnuafl til fleiri en eins bæjarhluta.

Fundargerð eigna-, skipulags- og umhverfisnefndar nr. 85 frá 27. janúar lögð fram til kynningar.