Fræðslunefnd

Borist hefur bréf, dagsett 4. febrúar 2016, frá Umboðsmanni barna þar sem hann minnir sveitarstjórnir á þá skyldu sína að setja hagsmuni barna i forgang. Bréfið kemur í kjölfar umræðu um fyrirhugaðan niðurskurð á skóla- og frístundasviði Reykjavíkurborgar en svipað bréf barst til sveitarstjórna í mars 2011 þar sem beðið var um að börnum verði hlíft við niðurskurði. Umboðsmaður biður sveitarstjórnir að ígrunda vel hvaða áhrif aðgerðir til hagræðingar hafi til langs tíma og skorar á sveitarfélög að virða Barnasáttmálann í störfum sínum og láta hagsmuni barna ganga framar hugsanlegum fjárhagslegum hagsmunum sveitarfélaga. Lagt fram til kynningar.

Fyrir liggja þrjár fundargerðir framkvæmdastjórnar Skólaskrifstofu Austurlands frá 22.desember, 30.desember og 12.janúar sl. lagðar fram til kynningar.

Lögð voru fram lokadrög að fjölskyldustefnu Fjarðabyggðar sem unnin voru af fjölskipuðum starfshópi sem Hrönn Pétursdóttir verkefnastjóri leiddi. Fræðslunefnd hafði drög að fjölskyldustefnu til umfjöllunar á fundi sínum 9. september 2015 þar sem nefndin gerði nokkrar athugasemdir. Fræðslunefnd gerir ekki athugasemdir við fyrirliggjandi drög og fagnar framkomnum áherslum.

Starfandi skólastjóri leikskólans Sólvalla kynnti starf skólans og ræddi við nefndina um starfsemi skólans og þær miklu breytingar sem í vændum eru með tilkomu nýja leikskólahúsnæðisins í ágúst 2016. Fræðslunefnd þakkar skólastjóra fyrir greinargóða kynningu.