Bæjarráð

Framlögð drög að tillögu að fjárhagsáætlun Fjarðabyggðar fyrir árið 2018 ásamt minnisblaði fjármálastjóra um breytingar á fjárhagsáætluninni.
Vísað til fjárhagsáætlunargerðar.

Lagðar fram heillaóskir vegna vígslu Norðfjarðarganga frá Samgöng, samtökum áhugafólks um veggöng á Austurlandi og Samgöngufélaginu.
Bæjarráð þakkar heillaóskir og felur bæjarritara að koma þökkum á framfæri.

Lögð fram til kynningar fyrsta fundargerð samráðsnefndar um mögulega sameiningu Breiðdalshrepps og Fjarðabyggðar.

Framlögð skýrsla upplýsingafulltrúa um stöðu ferðamála í Fjarðabyggð sumarið 2017. Í skýrslunni er farið yfir aðsókn að söfnum, tjalssvæðum og sundlaugum. Vísað til kynningar í menningar- og safnanefnd og íþrótta- og tómstundanefnd.

Lagðir fram til staðfestingar leigusamningar við landeigendur Sellátra og Högnastaða vegna Skíðasvæðisins í Oddsskarði.
Bæjarráð staðfestir samningana og felur bæjarstjóra undirritun þeirra.

Framlagt bréf Hollvinasamtaka félagsheimilisins Skrúðs sem fjallar um eignarhald á húsinu.
Bæjarráð felur bæjarstjóra að ræða við bréfritara og málið verður tekið fyrir að nýju í bæjarráði.

Framlagt bréf Fjarskiptasjóðs þar sem upplýst er að gervihnattasamband við Dalatanga verður lagt af um næstu áramót en þá rennur út samningur Fjarskiptasjóðs og Radíómiðlunar.
Bæjarráð mótmælir harðlega áformum Fjarskiptasjóðs um að leggja af gervihnattasamband við Dalatanga enda sé um að ræða skerðingu á þjónustu og öryggi staðarins. Þá þjónar Dalatangi mikilvægu hlutverki vegna veðurathugana og aðstæður á staðnum þannig að fjarskipti við hann verða ekki leystar með öðrum hætti.
Bæjarstjóra falið að ræða við Fjarskiptasjóð.

Tíu aðilar sóttu um stöðu framkvæmdastjóra hafna en staðan var auglýst með umsóknarfrest til og með 23.október. Capacent ráðningar, í samráði við bæjarstjóra, hafa unnið að ráðningarferlinu og veitt bæjarstjóra ráðgjöf í ferlinu.
Fyrir liggur tillaga bæjarstjóra, sem unnin var í samráði við hafnarstjórn, með greinagerð um að Hákon Ásgrímsson verði ráðinn framkvæmdastjóri hafna. Tillögunni til stuðnings er vísað til umfjöllunar í greinargerð bæjarstjóra sem og annarra gagna máls, þ.m.t. samantektar og mats sem unnið var af Capacent ráðningum. Þá er í tillögunni ennfremur vísað til mannauðsstefnu sveitarfélagsins og reglur þess um ráðningarferli hjá sveitarfélaginu.
Bæjarráð fór yfir tillögu bæjarstjóra að ráðningu framkvæmdastjóra hafna og lagði mat á hana. Bæjarráð staðfestir tillögu bæjarstjóra um að ráða Hákon Ásgrímsson sem framkvæmdastjóra hafna. Jafnframt felur bæjarráð bæjarstjóra að bjóða Hákoni Ásgrímssyni ráðningu í starfið og ganga frá gerð ráðningarsamnings.

Lögð fram drög að samningi vegna framlags Vegagerðarinnar til Slökkviliðs Fjarðabyggðar vegna Norðfjarðarganga.
Bæjarráð samþykkir samninginn og felur bæjarstjóra undirritun hans.

Fundargerð aðalfundar HAUST frá 1. nóvember 2017 lögð fram til kynningar.
Vísað til eigna-, skipulags- og umhverfisnefndar.

Fundargerð hafnarstjórnar frá 16.nóvember 2017 lögð fram til kynningar.

Fundargerð félagsmálanefndar frá 14.nóvember 2017 lögð fram til kynningar.