Bæjarráð

Framlagt yfirlit fjármálastjóra yfir rekstur málaflokka janúar - júní 2018 og skatttekjur og launakostnað janúar - júlí 2018. Yfirlitið lagt fram sem trúnaðarmál

Framlagt minnisblað fjármálastjóra um forsendur fjárhagsáætlunar Fjarðabyggðar 2019 - 2022 auk þjóðhagsspár Hagstofu Íslands að sumri.
Vísað til áframhaldandi fjárhagsáætlunarvinnu.

Sameina þarf fjárhagsáætlun Fjarðabyggðar og Breiðdalshrepps fyrir árið 2018. Fjárhagsáætlun Breiðdalshrepps er tekin inn sem viðauki við fjárhagsáætlun Fjarðabyggðar fyrir árið 2018 sem viðauki 3 við Fjárhagsáætlun Fjarðabyggðar og stofnana fyrir árið 2018.
Fjárhagsáætlun Breiðdalshrepps kemur sem viðauki við fjárhagsáætlun Fjarðabyggðar fyrir árið 2018.
Fjárhagslegu áhrif sameiningarinnar við Breiðdalshrepp er þau að handbært fé Aðalsjóðs hækkar um kr. 53.662.000 og mun nema í árslok kr. 262.019.000.
Bæjarráð staðfestir í umboði bæjarstjórnar viðauka 3 við fjárhagsáætlun 2018.

Framlagt minnisblað um feril ljósleiðaramálsins í sveitarstjórn Breiðdalshrepps. Gerð grein fyrir framvindu verkefnisins.
Sviðsstjóra veitusviðs falið að vinna að málinu áfram í samstarfi við fjármálastjóra og bæjarritara. Tekið upp að nýju á næsta fundi bæjarráðs.

Framlagt bréf Hákons Hanssonar þar sem boðað er til aðalfundar Breiðdalsseturs 1. september nk. Jafnframt er óskað er eftir skipan fulltrúa Fjarðabyggðar í stjórn setursins.
Bæjarráð samþykkir að fulltrúar í Fjarðabyggðar í stjórninni verði Pétur Pétursson aðalmaður og Anna Margrét Birgisdóttir varamaður.

Umræða um samninga Fjarðabyggðar og Heilbrigðisstofnunar Austurlands um sjúkraflutninga.
Bæjarráð felur bæjarstjóra og bæjarritara að funda með forstjóra Heilbrigðisstofnunar Austurlands vegna samninga um sjúkraflutninga.

Skipun fulltrúa í starfshóps í Skugga valdsins og #metoo. Endurskipa þarf í starfshópinn og ljúka vinnu sem hópnum var falin.
Bæjarráð samþykkir að starfshópinn skipi Sigurður Ólafsson, Eydís Ásbjörnsdóttir og Dýrunn Pála Skaftadóttir. Formaður hópsins er Eydís Ásbjörnsdóttir. Með hópnum starfa bæjarstjóri, bæjarritari og félagsmálastjóri.

Framlögð drög að endurskoðun á siðareglum kjörinna fulltrúa.
Vísað til vinnu starfshóps í skugga valdsins og #metoo.

Framlögð drög að endurskoðun á siðareglum stjórnenda.
Vísað til vinnu starfshóps í skugga valdsins og #metoo.

Stofnun hóps embættismanna innan bæjarkerfisins, sem hefur það verkefni að styðja verkefnastjóra vegna móttöku flóttafólks.
Samþykkt að hópinn skipi bæjarritari, félagsmálastjóri, fræðslustjóri og fjármálastjóri.

Framlagt erindi frá Hollvinasamtökum um samkomulag vegna endurgerðar gamla barnaskólans á Eskifirði.
Bæjarráð samþykkir framlagðan samning við Hollvinasamtök barnaskólans á Eskifirði um endurgerð skólabyggingarinnar með þeim fyrirvara að fasteigninni hafi verið afsalað til Fjarðabyggðar fyrir vikulokin. Bæjarstjóra falið að undirrita samkomulag.

Framlagður tölvupóstur frá Sambandi sveitarfélaga á Austurlandi þar sem kallað er eftir tillögum að ályktunum fyrir aðalfund ársins 2018.
Farið yfir tillögur Fjarðabyggðar að ályktunum. Forseta bæjarstjórnar og formanni bæjarráðs falið að vinna þær áfram og leggja fyrir stjórn Sambands sveitarfélaga á Austurlandi.

Framlagt boð Gravelines á Íslandsdaga þann 28. til 30. september 2018.
Bæjarráð samþykkir að fulltrúar Fjarðabyggðar á Íslandsdögum í Gravelines verði Sigurður Ólafsson, Pálína Margeirsdóttir ásamt fulltrúa frá Frönskum dögum.

Síðari umræða. Eigna-, skipulags- og umhverfisnefnd hefur samþykkt samþykkt um afgreiðslur bygginganefndar, fyrir sitt leyfi, og vísar endanlegri afgreiðslu til bæjarráðs í umboði bæjarstjórnar.
Bæjarráð staðfestir samþykkt um afgreiðslur byggingarnefndar í umboði bæjarstjórnar.

Framlagt til kynningar bréf umhverfisstjóra er varðar kvikmyndatökustað í Oddsskarði og á Fáskrúðsfirði vegna gerðar kvikmyndarinnar Hvítur, hvítur dagur.

Framlagt til kynningar bréf frá Seyðisfjarðarkaupstað um skipan Elfu Hlínar Pétursdóttur í svæðisráð vegna strandsvæðisskipulags Austfjarða.

Fundargerð eigna- skipulags- og umhverfisnefndar, nr. 210 frá 30.júlí 2018, samþykkt í umboði bæjarstjórnar.

Fundargerðir barnaverndarnefndar, nr. 86 og nr. 87 frá 31.júlí og 7.ágúst 2018, samþykktar í umboði bæjarstjórnar.