Eigna- skipulags- og umhverfisnefnd

Gestir fundarins eru Ásta Ásgeirsdóttir skólastjóri Grunnskóla Reyðarfjarðar, Lísa Lotta Björnsdóttir skólastjóri Leikskólans Lyngholts, Aðalheiður Vilbergsdóttir formaður umf Vals og Anna Sigrún Ben frá Íbúasamtökum Reyðarfjarðar.
Leitað er álits gesta á umferð um Heiðarveg milli leik-, grunnskóla- og íþróttahúss og mögulegra úrbóta til að tryggja öryggi gangandi og akandi vegfarenda sem um götuna fara. Þá er leitað álits gesta á annarri framtíðar uppbyggingu á svæðinu t.d varðandi íþróttamannvirki.

Lagt fram að nýju, eftir umfjöllun landbúnaðarnefndar, bréf landeiganda Óseyrar í Stöðvarfirði varðandi lausagöngu fjár á jörðinni, lausagöngu fjár í Stöðvarfirði og lausagöngu fjár í Fjarðabyggð, dagsett 23. september 2019. Lagt fram minnisblað umhverfisstjóra um girðingar og þátttöku kostnaðar, dagsett 25. september 2019.
Eigna-, skipulags- og umhverfisnefnd tekur undir bókun landbúnaðarnefndar. Nefndin samþykkir jafnframt að við endurskoðun aðalskipulags verði ákvæði um beitarfriðun endurskoðuð. Umhverfisstjóra er falið að vinna drög að svörum við spurningum bréfritara í samræmi við umræðu og leggja fyrir nefndina.

Lagt fram minnisblað umhverfisstjóra um árlega styrki Umhverfis- og auðlindaráðuneytis til verkefna sem falla undir þeirra málefnasvið. Umsóknarfrestur rennur út kl. 16:00 3. janúar nk.
Eigna-, skipulags- og umhverfisnefnd felur umhverfisstjóra að sækja um styrk í verkefnið "Ert þú þá refurinn" samkvæmt umræðum á fundinum.

Lögð fram beiðni Matvælastofnunar um umsögn vegna umsóknar Laxa fiskeldis ehf á 3.000 tonna framleiðslu á lagi í Reyðarfirði.
Lagt fram minnisblað atvinnu- og þróunarstjóra, umhverfisstjóra og sviðsstóra umhverfis- og framkvæmdasviðs vegna beiðnar Matvælastofnunar dagsett 13. desember 2019.
Eigna-, skipulags- og umhverfisnefnd samþykkir fyrir sitt leyti að svar Fjarðabyggðar verði byggt á niðurstöðu minnisblaðs. Endanlegri útgáfu er vísað til bæjarráðs.

Lögð fram beiðni umhverfis- og samgöngunefndar Alþingis, dagsett 9. desember 2019, um umsögn um frumvarp til laga um breytingu á lögum um hollustuhætti og mengunarvarnir, nr. 7/1998, með síðari breytingum.
Eigna-, skipulags- og umhverfisnefnd frestar afgreiðslu.

Lagður fram til kynningar undirskriftalisti 89 íbúa á Eskifirði með áskorun um að byggingar við Dalbraut 4 á verði færðar út fyrir íbúabyggð við fyrsta tækifæri. Listinn var afhentur á íbúafundi á Eskifirði 2. desember síðastliðinn.

Eigna-, skipulags- og umhverfisnefnd felur sviðstjóra umhverfis- og skipulagssviðs að svara bréfritara í samræmi við umræðu á fundinum.

Lagt fram að nýju samkomulag um kvöð á aldursmörkum í séreignaíbúðum í fjöleignahúsinu við Melgerði 13 á Reyðarfirði sem gerir ráð fyrir að allir íbúar séu 55 ára eða eldri. Lögð fram bréf Pacta lögmanna f.h. stjórnar húsfélags hússins vegna kvaðar um aldursmörk, dagsett 20. nóvember 2019, 13. desember 2019 og 16. desember 2019. Samþykki allra annarra eiganda liggur nú fyrir. Fjarðabyggð er eigandi þjónusturýmis í fjöleignahúsinu.
Eigna-, skipulags- og umhverfisnefnd samþykkir kvöð um aldursmörk í húsinu og felur bæjarstjóra að undirrita yfirlýsingu þess efnis fyrir hönd Fjarðabyggðar.

Lögð fram stöðuleyfisumsókn Ara Benediktssonar/Mannvits hf fh. Eimskips, dagsett 12. desember 2019, þar sem sótt er um endurnýjun stöðuleyfis fyrir starfsmannaaðstöðu Eimskips í gámaeiningum innan hafnarsvæðis Mjóeyrarhafnar.
Eigna-, skipulags- og umhverfisnefnd vísar erindinu til umsagnar hafnarstjórnar.

Lagt fram bréf Ormarrs Örlygssonar fh. Alcoa Fjarðaál, dagsett 6. nóvember 2019, þar sem óskað er eftir framlengingu stöðuleyfis starfsmannabúðanna að Högum til 1. júlí 2020.
Eigna-, skipulags- og umhverfisnefnd samþykkir útgáfu stöðuleyfis á sömu forsendum og árið 2018 og miðast það við þann fjölda gámaeininga sem var á svæðinu þegar stöðuleyfið rann út þann 1. júlí 2019.

Lögð fram byggingarleyfisumsókn Halldórs Eiríkssonar hjá TBL architects fh. Alcoa Fjarðaál sf, dagsett 14. nóvember 2019, þar sem sótt er um samþykki á breytingum á fyrirkomulagi gashleðslu, færslu girðingar og breyttri opnun girðinga við 645 LPG gasgeymslu að Hrauni 1 á Reyðarfirði.
Eigna-, skipulags- og umhverfisnefnd samþykkir umsóknina.

Lögð fram beiðni Guðgeirs Einarssonar um sameiningu lóðanna við Fagradalsbraut 2 og 4 sem eru innan búfjárbyggðarinnar Kolls innan við þéttbýlið á Reyðarfirði, dagsett 3. desember 2019. Samkvæmt deiliskipulagi stendur nú sambyggð bygging á báðum lóðunum. Samþykki annarra eiganda liggur fyrir.
Eigna-, skipulags- og umhverfisnefnd samþykkir beiðni um sameiningu lóðanna.

Lögð fram beiðni Elsu Sigrúnar Elísdóttur um staðfestingu á eldri heimild til að taka land í fóstur vestan- og norðan við íbúðarhúsalóð hennar við Stekkholt 13 á Fáskrúðsfirði, dagsett 13. desember 2019. Jafnframt er tilkynnt um að 9 fm smáhýsi undanþegið byggingarleyfi sbr. g. lið gr. 2.3.5 í byggingarreglugerð nr. 112/20112 hefur verið byggt á lóðinni.
Eigna-, skipulags- og umhverfisnefnd staðfestir beiðni um að taka land í fóstur.

Lögð fram framkvæmdaleyfisumsókn Mílu ehf. dagsett 12. nóvember 2019, þar sem óskað er eftir heimild til að leggja ljósleiðara í dreifbýli í Eskifirði og Norðfirði ásamt lögn rafstrengja á ábyrgð RARIK í dreifbýli á Eskifirði.
Eigna-, skipulags- og umhverfisnefnd samþykkir útgáfu framkvæmdaleyfis.

Lagt fram minnisblað Verkís vegna aðgerða við barnalyftu og skíðaskála vegna snjóflóðahættu innan skíðasvæðisins í Oddsskarði. Gerðar eru tillögur að nýrri staðsetningu byrjandalyftu, að verja núverandi lyftu með uppsetningu stoðvirkja og að verja lyftuna með varnargarði.
Eigna-, skipulags- og umhverfisnefnd vísar minnisblaði til umsagnar íþrótta- og tómstundanefndar.

Lögð fram tillaga að deiliskipulagi Heyklifs, á vinnslustigi, sem gerir ráð fyrir uppbyggingu ferðaþjónustu að Heyklifi á Kambanesi við Sunnanverðan Stöðvarfjörð. Gert er ráð fyrir hóteli, veitingaþjónustu, misstórum húsum og smáýsum á svæðinu til útleigu fyrri ferðamenn.
Eigna-, skipulags- og umhverfisnefnd samþykkir að kynna tillöguna sbr. 3. mgr. 40. gr. skipulagslaga nr. 123/2010. Tillagan verði aðgengileg íbúum og umsagnaraðilum til 3. janúar 2020.

Lögð fram tillaga að breytingu á Aðalskipulagi Fjarðabyggðar 2007-2027, á vinnslustigi, sem gerir ráð fyrir að landnotkun landbúnaðarsvæðisins við Heyklif á Kambanesi við sunnanverðan Stöðvarfjörð verði breytt þannig að gert verði ráð fyrir uppbyggingu ferðaþjónustu á svæðinu.
Eigna-, skipulags- og umhverfisnefnd samþykkir að kynna tillöguna sbr. 2. mgr. 30. gr. skipulagslaga nr. 123/2010. Breytingartillagan verði aðgengileg íbúum og umsagnaraðilum til 3. janúar 2020.

Samþykkt