Hafnarstjórn

Vöktun Mjóeyrarhafnar, áframhaldandi umræða. Hafnarstjórn samþykkir útfærslur í nýrri umgjörð um vöktun á Mjóeyrarhöfn og felur starfsmönnum að vinna að endanlegum samningi og útfærslu og leggja fyrir hafnarstjórn að nýju.

Gjaldtaka fyrir gámasvæði á Mjóeyrarhöfn rædd. Hafnarstjórn samþykkir að farið verði í breytingar á gjaldskrá er tengist geymslu gáma á Mjóeyrarhöfn. Verkefnastjóra hafna falið að leggja breytingu gjaldskrár fyrir að nýju.

Farið yfir málefni Græns orkugarðs.

Lagt fyrir bréf Sjávarútvegsskóla unga fólksins er varðar samstarf og kostnaðarþátttöku sumarið 2022. Hafnarstjórn samþykkir að styrkja Sjávarútvegsskóla unga fólksins líkt og síðustu ár.

Lögð fyrir umsókn Síldarvinnslunnar um löndunarlögn á olíubryggju við Fiskimjölsverksmiðju í Neskaupstað. Hafnarstjórn samþykkir umsóknina.

Lóðarumsókn Nes7 ehf, dagsett 9. janúar 2022, þar sem sótt er um lóð innan við smábátahöfnina Norðfirði fyrir 559 m2 iðnaðarhús með 7-10 iðnaðarbilum. Umsókn samræmist ekki gildandi deiliskipulagi svæðisins. Eigna-, skipulags- og umhverfisnefnd frestaði afgreiðslu og vísaði umsókninni til umsagnar hafnarstjórnar. Hafnarstjórn frestaði afgreiðslu á 275.fundi og fól hafnarstjóra að ræða við aðila. Málið nú lagt fram að nýju. Hafnarstjóri hefur rætt við umsækjanda þar sem núverandi lóð er ekki á skipulagi. Verið er að skoða aðra kosti og verður málið tekið fyrir að nýju.

Lóðarumsókn Nestaks ehf, dagsett 1. mars 2022, þar sem sótt er um norð-austanhorn lóðarinnar við Naustahvamm 76 fyrir 1.000 m2 iðnaðarhús með 10 iðnaðarbilum. Umsókn samræmist ekki gildandi deiliskipulagi svæðisins. Eigna-, skipulags- og umhverfisnefnd frestaði afgreiðslu og vísaði umsókninni til umsagnar hafnarstjórnar. Hafnarstjórn frestaði afgreiðslu á 275.fundi og fól hafnarstjóra að ræða við aðila. Málið nú lagt fram að nýju. Hafnarstjóri hefur rætt við umsækjendur og eru þeir að skoða aðra lóð. Hafnarstjórn samþykkir að koma að smávægilegum breytingum á þeirri lóð, ef af verður.

Lagt fram erindi frá Kristni Hjartarsyni fyrir hönd Keppings ehf. vegna skemmda sem urðu á húseign og bryggju við Egilsbraut 22 í Neskaupstað í óveðri þann 4. janúar síðastliðinn. Hafnarstjórn samþykkir að veita styrk í samræmi við reglur um styrki til viðhalds og endurgerðar gamalla bryggja. Framkvæmdasviði er falið að skoða möguleika í sjóvörnum á þessu svæði.

Kynning á svæðisskipulagi Austurlands. Eydís Ásbjörnsdóttir kynnti tillögu að svæðisskipulagi Austurlands. Tillagan og umhverfismatsskýrsla hennar hefur verið birt til kynningar og umsagnar í samráðsgátt stjórnvalda og á vef Austurbrúar og Fjarðabyggðar og verður aðgengileg þar til og með 21. apríl næstkomandi. Kynningin er á grundvelli 2. mgr. 23. gr. skipulagslaga nr. 123/2010 og 13. og 14. gr. laga um umhverfismat framkvæmda og áætlana nr. 111/2021.