Menningar- og nýsköpunarnefnd

Fyrsta umræða um endurskoðun menningarstefnu Fjarðabyggðar. Lagt fram minnisblað forstöðumanns menningarstofu. Forstöðumaður menningarstofu fór yfir þær áherslur sem hún telur mikilvægar og hvernig best væri að byggja ofan á þá vinnu, sem unnin var þegar stefnan var mótuð í upphafi. Rætt um að stefnan verði einfölduð og gerð aðgengilegri. Menningar- og nýsköpunarnefnd felur forstöðumanni menningarstofu að leggja fyrir nefndina í byrjun desember, tillögur um endurskoðun menningarstefnu.

Umræða um græna atvinnustarfsemi og valkosti sem geta fallið að nýsköpun í samfélaginu og atvinnulífinu í Fjarðabyggð. Minnisblað atvinnu- og þróunarstjóra lagt fram. Nefndin telur, á grundvelli minnisblaðs, að fyrsta skref í átt að því að laða að græna atvinnustarfsemi til sveitarfélagsins, þurfi sveitarfélagið að móta sér umhverfisstefnu. Menningar- og nýsköpunarnefnd óskar eftir minnisblaði frá umhverfisstjóra um stöðu vinnu við umhverfisstefnu.

Framlagt erindi Þórs Jakobssonar er varðar uppsetningu á skildi til minningar um Richard Long. Bæjarráð tók vel í erindið og vísaði því til menningar- og nýsköpunarnefndar. Menningar- og nýsköpunarnefnd óskar eftir áliti skipulags- og byggingarfulltrúa á hugmyndum um staðsetningu. Tekið fyrir á næsta fundi.

Skipan tveggja fulltrúa á aðalfund Tónlistarmiðstöðvar Austurlands. Menningar- og nýsköpunarnefnd felur Körnu og Gunnlaugi Sverrissyni að sækja aðalfund.

Skýrsla um ferðasumarið 2018 lögð fram til kynningar. Menningar- og nýsköpunarnefnd óskar eftir upplýsingum um stöðu vinnu við mótun stefnu í málefnum ferðaþjónustunnar.

Fundargerð safnanefndar, nr. 4 frá 6.nóvember 2018, samþykkt með fimm atkvæðum.