Töluvert af sjó komst í fóðurpramma Laxa EHF við Gripalda í Reyðarfirði í gærkvöldi, sem olli því að pramminn sökk síðar í nótt. Varðskipið Þór er á staðnum, og hefur verið unnið að því að tryggja mengunarvarnir á svæðinu.
10.01.2021
Fóðurprammi sökk við Gripalda í Reyðarfirði
Enginn var um borð í prammanum þegar þetta átti sér stað, en um borð eru um 10 þúsund lítrar af díselolíu.
Varðskipið Þór hefur verið á svæðinu í nótt, vaktað það, og tryggt mengunarvarnir. Í birtingu munu aðstæður síðan verða metnar frekar, og kannað hvort hægt verði að lyfta prammanum upp.
Fjarðabyggðarhafnir fylgjast náið með aðstæðum á svæðinu, og verða frekari tilkynningar sendar út þegar þær liggja fyrir.