Í desember 2019 var sú ákvörðun tekinn að selja Rafveitu Reyðarfjarðar. Fyrir lá af hálfu bæjarstjórnar að hagnaður af sölunni færi óskiptur til uppbyggingar innviða á Reyðafirði. Að höfðu samráði við íbúa var ákveðið að fjármununum, um 410 milljónum, skildi varið til uppbyggingar á nýju íþróttahúsi á Reyðarfirði.

Á vordögum var síðan settur saman starfshópur um nýtt íþróttahús á Reyðarfirði. Í hópnum áttu sæti fulltrúar Íbúasamtakanna á Reyðarfirði, ungmennafélagsins Vals, formenn íþrótta- og tómstundanefndar, eigna- skipulags-, og umhverfisnefndar, ásamt tveim bæjarráðsmönnum auk nokkurra embættismanna.

Hópurinn fundaði nokkrum sinnum frá því í apríl til nóvember og ræddi um staðsetningu, skipulagsmál og tegund þess húsnæðis sem reisa ætti. Ákveðið var að húsið skyldi reist á svæðinu við núverandi íþróttahús á Reyðarfirði, en þannig nýtist búningsaðstaða  sem fyrir er í íþróttamannvirkjum á Reyðarfirði. Leitað var til Verkfræðistofunnar Mannvits vegna hönnunar hússins og efnisvals.

Jarðvegsvinna á svæðinu hófst síðan í sumar, en lögð var áhersla á að ljúka henni áður en skóli yrði settur í haust. Á meðan vann Mannvit að loka hönnun byggingarinnar, í samvinnu við starfshópinn og liggur hún nú fyrir. Um er að ræða límtréshús sem er um 1500 m². auk þess sem gert er ráð fyrir tengibyggingu við núverandi íþróttahús sem er rúmlega 200 m². Hönnun og útlit hússins má sjá á skemmtilegu myndbandi sem finna má á Youtube síðu Fjarðabyggðar með því að smella hér.

Nú hefur verið auglýst útboð á uppsteypu og grunnlögnum hússins, og gert er ráð fyrir að þeim verkþætti verði lokið í mars 2021 þannig að hægt verði að hefja vinnu við að reisa húsið sjálft. Gert er ráð fyrir að íþróttahúsið verði komið í notkun á haustmánuðum 2021 en frágangur við tengibyggingu að innan verði unnin síðan í kjölfarið